Дар маъракаи «Корвони саломатӣ» ба зиёда аз 8000 нафар шаҳрванд хизмати тиббии ройгон расонида шуд

ДУШАНБЕ, 30.01.2019 /АМИТ «Ховар»/. Аз ҷониби духтурони «Корвони саломатӣ» дар деҳаҳои  ҳудуди ҷамоатҳои деҳоти ба номи Ҷӯра Раҳмонов, Пахтаобод ва Регари ноҳияи Турсунзода   маъракаи марказонидашудаи  тиббию   машваратии «Корвони саломатӣ» гузаронида шуд.  Дар ин бора ба АМИТ «Ховар» аз маркази матбуоти раиси шаҳри Турсунзода иттилоъ доданд.

Ҳайати мазкур давоми 10 рӯз беморони барҷомонда, маъюбон, иштирокчиёни ҷангу меҳнат, ҷанговарони байналмилал, чернобилчиён, шахсони муътабар  ва дигар ниёзмандонро  хона ба хона хабар гирифта, аз муоинаи тиббӣ гузаронида, ба онҳо машваратҳо доданд. Ҳамзамон  дар марказҳо, бунгоҳҳо ва хонаҳои  саломатии деҳот  тавассути дастгоҳу таҷҳизоти муосири тиббӣ  ба  зиёда аз  8000 нафар шаҳрванд хизматрасонии тиббии ройгон расонида шуд.

Маъракаи мазкур дар доираи татбиқи амри раиси шаҳри Турсунзода «Дар бораи ташкил ва гузаронидани рӯзҳои мақомоти иҷроияи ҳокимияти давлатии шаҳр дар ҷамоатҳои деҳот ва қитъаҳои истифодабарии манзилҳои шаҳри Турсунзода» гузаронида шуда, мақсади он аз пешгирии беморшавии аҳолӣ, баланд бардоштани фарҳанги тиббии аҳли ҷомеа ва баргузории муоинаи  саривақтии сокинон   иборат буд.

Барои  дар сатҳи зарурӣ анҷом додани маъракаи мазкур гурӯҳи мутахассисони шаҳрӣ, дастгоҳҳои  сабти  барқии дил,  ултрасадо ва  нақлиёти сайёри тиббӣ сафарбар карда шуд. Инчунин дар нақлиёти тиббӣ таҷҳизоти  баландгӯяк насб гардида, вобаста ба пешгирии бемориҳои сироятӣ, аз қабили ВНМО, гепатитҳо, зардпарвин, сил, зуком ва ғайра маълумот пахш гардиданд. Ҳамзамон ба модарони ҷавон моҳияти шири модар ва ширмаконӣ ба кӯдакон мавриди шарҳ қарор дода шуд.

Дар асоси дастури раиси шаҳр маъракаи мазкур дар ҳудуди дигар ҷамоатҳои деҳот ва маркази шаҳр гузаронида мешавад.