Директори Литсейи касбии техникии шаҳри Бохтар номзад ба вакилии Маҷлиси намояндагон пешбарӣ карда шуд

ДУШАНБЕ, 13.01.2020 /АМИТ «Ховар»/. Дар Конференсияи якҷояи Ҳизби Халқии Демократии Тоҷикистон дар шаҳрҳои Бохтар, Леваканд ва ноҳияи Кӯшониён директори Литсейи касбии техникии шаҳри Бохтар бо гирифтани аксари овозҳои вакилон ҳамчун номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи Бохтар №26 пешбарӣ карда шуд.

Дар конференсия муовини раиси Кумитаи иҷроияи ҲХДТ дар вилояти Хатлон Дилафрӯзи Абдулло, узви Кумитаи иҷроияи ҲХДТ дар шаҳри Бохтар Шоиста Абудназарзода, раисони КИ ҲХДТ дар шаҳри Леваканд ва ноҳияи Кӯшониён, намояндагони комиссияи ҳавзаи интихоботии Бохтар №26, вакилон аз ташкилотҳои ибтидоии ҳизбӣиштирок доштанд.

Рӯзномаи маҷлис аз як масъала “Пешбарии номзад ба вакилии Маҷлиси намояндагони Маҷлиси Олии Ҷумҳурии Тоҷикистон аз ҲХДТ дар ҳавзаи интихоботии якмандатаи Бохтар №26”, иборат буд.

Баъди тасдиқи ҳайати котибот, ҳайати комиссияи баҳисобгирии овозҳо интихоб гардид. Аз ҷониби раиси Кумитаи иҷроияи ҲХДТ дар шаҳри Бохтар Н.Иброҳимзода номзадии узви ҲХДТ Саидбурҳон Шарипов ба вакилии Маҷлиси намояндагони Малҷиси олии Ҷумҳурии Тоҷикистон аз ҳавзаи интихоботии якмандатии Бохтар №26 пешбарӣ гардид.

Шарифов Саидбурҳон Ғазоевич 2 октябри соли 1977 дар ноҳияи Балҷувони вилояти Хатлон таваллуд шуда, соли 2000 факултети филологияи тоҷики Донишгоҳи давлатии шаҳри Бохтар ба номи Носири Хусравро хатм кардааст. Фаъолияти меҳнатиашро аз вазифаи омӯзгор оғоз намуда, то имрӯз дар вазифаҳои мухталифи пурмасъул ифои вазифа намуда, ҳоло ба ҳайси директори Литсейи касбии техникии шаҳри Бохтар фаъолият дорад.