«Корҳо дар НБО «Себзор» ба маблағи умумии 1,7 млн. доллар иҷро шуданд»,-бардошт аз нишасти матбуотӣ

Январь 27, 2020 17:30

ДУШАНБЕ, 27.01.2020. /АМИТ «Ховар»/. Соли 2019 барои бунёди Неругоҳи барқи обии «Себзор» дар ноҳияи Роштқалъаи Вилояти Мухтори Кӯҳистони Бадахшон  дар маҷмӯъ ба маблағи 50,7 млн. доллари америкоӣ созишномаҳои молиявӣ ба имзо расонида шуда, ба маблағи умумии 1,7 млн. доллар корҳо иҷро карда шуданд. Дар ин бора имрӯз зимни нишасти матбуотӣ Вазири энергетика ва захираҳои оби Ҷумҳурии Тоҷикистон Усмоналӣ Усмонзода зикр намуд.

«Дар айни замон ҷиҳати ба низоми энергетикии ВМКБ пайваст намудани неругоҳи мазкур чорабиниҳои озмунӣ дар самти бунёди хати интиқоли барқи 110кВ “Себзор – Хоруғ” ва корҳо бо шарикони рушд вобаста ба “Бунёди хати интиқоли барқи 110кВ Хоруғ – Қозидеҳ”, ки барои ба Ҷумҳурии Исломии Афғонистон содир намудани неруи барқи дар Неругоҳи барқи обии “Себзор” истеҳсолшаванда нигаронида шудаанд, идома доранд»,-илова намуд Вазир.

Ёдовар мешавем, ки 29 июли соли 2015 дар деҳаи Барҷангали ҷамоати деҳоти ба номи Мирсаид Миршакари ноҳияи Роштқалъа Президенти Ҷумҳурии Тоҷикистон муҳтарам Эмомалӣ Раҳмон бо гузоштани санги асос ба корҳои сохтмонии НБО «Себзор» оғоз бахшиданд.

Мавриди зикр аст, ки бо мақсади рушди устувори деҳот, энергияи сабз ва  паст намудани сатҳи камбизоатии сокинони ноҳияи дурдасти Тоҷикистон, дар дарёи Шоҳдара дар ноҳияи Роштқалъа дар масофаи 15 километр дар қисми шарқии шаҳри Хоруғ Неругоҳи барқии обии  «Себзор» бунёд мешавад. Баъди ба кор даровардани неругоҳ то 60 нафар кадрҳои соҳибихтисоси маҳаллӣ соҳиби ҷойи кори доимӣ мешаванд. Дар доираи амалишавии он тахминан 220 ҳазор нафар аҳолӣ бо неруи барқ таъмин хоҳанд шуд. Ҳамзамон шароит ба миён меояд, ки неруи барқи зиёдатӣ дар фасли тобистон ба ноҳияҳои наздисарҳадии Ҷумҳурии Исломии Афғонистон содир карда шавад.

Лоиҳаи сохтмони НБО «Себзор» бо иқтидори лоиҳавии 10 мегаватт бо истеҳсоли солонаи неруи барқ дар ҳаҷми 60 миллион кВт дар «Барномаи дарозмуддати бунёди силсилаи неругоҳҳои барқии хурд дар давраи солҳои 2009-2020» ба нақша гирифта шудааст. Барои сохтмони неругоҳ беш аз 180 миллион сомонӣ пешбинӣ шудааст.

Бо сохтмони НБО «Себзор» бунёди хати баландшиддати интиқоли барқи 110 киловолтаи «Себзор — Хоруғ» бо дарозии тақрибан 18 километр дар назар дошта шудааст, ки ин минбаъд боиси баланд шудани эътимоднокӣ ва беҳтар шудани сифати барқ дар шабакаи марказӣ хоҳад гашт.

Январь 27, 2020 17:30

Хабарҳои дигари ин бахш

Оид ба оғози раванди такмили Саҳми дар сатҳи миллӣ муайяншудаи Тоҷикистон (NDC 3.0.) ҳамоиш доир шуд
Вобаста ба истеҳсол ва истифодаи энергияи барқароршаванда дар иқтисодиёти «сабз» ҳамоиш доир шуд
НИШАСТИ МАТБУОТӢ. Палатаи савдо ва саноат иштироки соҳибкоронро дар 12 намоишгоҳи байналмилалӣ таъмин намуд
НИШАСТИ МАТБУОТӢ. Агентии хоҷагии ҷангал дар доираи Барномаи давлатии кабудизоркунӣ зиёда аз 102 ҳазор бех ниҳол шинонид
Муовини Сарвазири Тоҷикистон бо фаъолияти хоҷагиҳои кишоварзӣ, ҷамъоварии пахта ва ҷараёни кишти такрорӣ дар шаҳри Ҳисор шинос шуд
Ҳайати Тоҷикистон дар Машварати 10-уми вазирони кишоварзии Созмони ҳамкории Шанхай иштирок намуд
НАСБИ ПАНЕЛҲОИ ОФТОБӢ ДАР БИНОҲОИ НАВСОХТ ҲАТМӢ ГАРДИД. Истифодаи неруи Офтоб дар нақлиёти барқӣ низ муфид аст
Ҳамкории Тоҷикистону Узбекистон дар мубориза бо коррупсия тақвият меёбад
НИШАСТИ МАТБУОТӢ. Ҳаҷми истеҳсоли неруи барқ дар Тоҷикистон беш аз 8,9 миллиард кВт-соатро ташкил дод
Тоҷикистон ва Беларус густариши ҳамкории тиҷоратию иқтисодӣ ва кишоварзиро баррасӣ намуданд
200 нафар занони соҳибкор аз грантҳои Президенти Ҷумҳурии Тоҷикистон бархурдор мегарданд
Дар беш аз 500 гектар замини хоҷагиҳои ҷамоавӣ ва деҳқонии Тоҷикистон боғу токзори нав бунёд гардидааст