Сарвазири Ҷумҳурии Тоҷикистон Қоҳир Расулзода дар Форуми «Digital Qazaqstan» иштирок намуд

ДУШАНБЕ, 27.03.2026 /АМИТ «Ховар»/. 27 марти соли 2026 дар шаҳри Шимкенти Ҷумҳурии Қазоқистон Сарвазири Ҷумҳурии Тоҷикистон Қоҳир Расулзода дар Форуми “Қазоқистони рақамӣ” («Digital Qazaqstan») иштирок ва суханронӣ намуд.

Дар форум доираи васеи намояндагони кишварҳои гуногун, аз ҷумла сарони ҳукуматҳо-сарвазирони кишварҳои Осиёи Марказӣ ва давлатҳои аъзои Иттиҳоди иқтисодии АвруОсиё, роҳбарони ширкатҳои пешбари технологӣ, созмонҳои байналмилалӣ, коршиносон ва соҳибкорони соҳаи технологияи  рақамӣ иштирок намуданд.

Сарвазири Тоҷикистон баргузор гардидани форумро дар рӯзҳои таҷлили Ҷашни байналмилалии Наврӯз рамзӣ арзёбӣ намуда, илова кард, ки Наврӯз аз оғози давраи нави ҳаёт мужда медиҳад ва дастовардҳои технологӣ бошанд боби наверо дар рушди кишварҳо мекушоянд.

Қоҳир Расулзода мавқеи устувори Тоҷикистонро дар рушди иқтисоди рақамӣ баён намуда, таъкид кард, ки дар кишвар бо роҳнамоии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон солҳои 2025–2030 «Солҳои иқтисоди рақамӣ ва инноватсия» эълон гардидаанд.

«Тоҷикистон инчунин гузариши рақамиро ҳамчун авлавияти миллӣ қатъиян муайян кардааст. Тавре Президенти Ҷумҳурии Тоҷикистон, Пешвои миллати мо муҳтарам Эмомалӣ Раҳмон таъкид менамоянд, «Рақамисозии иқтисод ин талаботи замон ва муҳимтарин омил барои пешрафт мебошад»», — зикр намуд Сарвазири кишвар

Изҳор карда шуд, ки ташаббуси Тоҷикистон дар сатҳи Созмони Милали Муттаҳид, яъне қабули қатънома дар бораи «Нақши зеҳни сунъӣ дар фароҳам овардани имконоти навин барои рушди устувор дар Осиёи Марказӣ», ҳамчун тасдиқи сиёсати кишвар дар пешбурди технологияи муосир пазируфта шудааст.

Дар зимн таъкид гардид, ки дар доираи ин ташаббуси глобалӣ дар Тоҷикистон аллакай Барномаи ҳамкорӣ дар соҳаи зеҳни сунъӣ ва инноватсия барои солҳои 2026–2027 тасдиқ карда шудааст.

Ҳамчунин аз нақшаи таъсиси Маркази минтақавии зеҳни сунъӣ дар шаҳри Душанбе, фаъолияти Шурои миллӣ оид ба зеҳни сунъӣ, татбиқи ҳалли зеҳни сунъӣ дар идораи давлатӣ, рушди IT-парк ва омодасозии мутахассисони соҳавӣ ёдоварӣ шуд.

Дар идома Сарвазири Тоҷикистон зарурати вусъати ҳамкории технологӣ байни кишварҳои минтақа ва ташкили «Роҳи Рақамии Абрешим»–ро таъкид намуда, пешниҳод кард, ки ҳамкории кишварҳо дар самтҳои табодули таҷриба ва омода намудани кадрҳо, ҳамгироии платформаҳои рақамӣ ва содагардонии расмиёти электронии фаромарзӣ ва ҳамкории муштарак дар ҳисоббарориҳои абрӣ ва зеҳни сунъӣ фаъол карда шавад

Дар анҷом изҳори итминон карда шуд, ки натиҷаҳои форум ба рушди ҳамкории судманд дар минтақа ва таҳкими дӯстию бародарии кишварҳо мусоидат хоҳанд кард.