Нишасти матбуотӣ: Корхонаи «Оҳангудозии Тоҷикистон» ба коҳиши нархи маҳсулоти сохтмонӣ заминаи мусоид гузошт

ДУШАНБЕ, 29.01.2020 /АМИТ «Ховар»/. 25 сентябри соли 2019 бо иштироки  Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Чоргултеппаи ноҳияи Рӯдакӣ ба фаъолияти корхонаи «Оҳангудозии Тоҷикистон» оғози расмӣ бахшида шуд, ки он ба коҳиши нархи маҳсулоти сохтмонӣ дар саросари мамлакат заминаи мусоид гузошт. Ин нуктаро имрӯз,  29 январ сардори Хадамоти зиддиинҳисории назди Ҳукумати Ҷумҳурии Тоҷикистон Абдулмаҷид Муминзод зимни нишасти матбуотии ин ниҳод ба доираи васеи намояндагони ВАО баён намуд.

Ҳамчунин мавсуф зикр кард, ки таҳлили семоҳаи чоруми соли гузашта дар бозори маҳсулоти гандуму орд ва сӯзишворӣ чунин натиҷаро муайян ва исбот намуд, ки субъектҳои хоҷагидор бо пешбурди муҳосиботи дугона ҳаҷми воқеии даромаду хароҷотро пинҳон намуда, бо  ин роҳ арзиши аслии маҳсулотро баланд нишон дода, аз қобилияти дарк накардани истеъмолкунандагон суиистифода менамоянд. Ҳамзамон бо кам нишон додани ҳаҷми воқеии истеҳсолот ба пинҳонсозии сарчашмаҳои андозӣ даст мезананд, ки ҳар ду амал дар ниҳоят барои фиреби истеъмолкунандагон ва давлат равона шудааст.

Инчунин ба саволҳои дигари рӯзноманигорон, аз ҷумла дар бораи  воридоти маҳсулоти хӯрокиву сӯзишворӣ ва болоравии нарх зимни нишаст масъулини ин ниҳод ҷавобҳои қонеъкунанда доданд.