«Ҳимояи Ватан қарзи шаҳрвандист»-ҳамоиши идона бахшида ба Рӯзи Артиши миллӣ

Февраль 21, 2020 14:15

ДУШАНБЕ, 21.02.20. /АМИТ «Ховар»/.  Имрӯз дар Китобхонаи миллии Тоҷикистон бахшида  ба таҷлили Рӯзи Артиши миллӣ таҳти унвони «Ҳимояи Ватан қарзи шаҳрвандист» ҳамоиши идона баргузор гардид.

Тавре мухбири АМИТ «Ховар» иттилоъ медиҳад, дар  ҳамоиши мазкур, ки бо ташаббуси шуъбаи хизматрасонии Китобхонаи миллии Тоҷикистон доир шуд, кормандони китобхона, афсарону сарбозон, кормандони Иттиҳодияи интернатсионалистони собиқадори Ҷумҳурии Тоҷикистон ва донишҷӯён иштирок доштанд.

Гуфта шуд, ки баъди пош хӯрдани Иттиҳоди Шӯравӣ сарфи назар аз он ки  мамлакатро вазъи печидаи ҳарбӣ-сиёсӣ ё худ муноқишаҳои дохилӣ фарогир буд, Тоҷикистони тозаистиқлол ба таъсиси Қувваҳои Мусаллаҳи худ шурӯъ намуд, ҳарчанд ки барои бунёди он ягон заминаи моддиву техникӣ вуҷуд надошт.

18 декабри соли 1992 аз ҷониби Раиси Шӯрои Олии Ҷумҳурии Тоҷикистон Эмомалӣ Раҳмон Қарор «Дар бораи таъсиси Қувваҳои Мусаллаҳи Ҷумҳурии Тоҷикистон» ба имзо расид.  Ҳамин тариқ, 23 феврали соли 1993 нахустин паради ҳарбӣ баргузор гардида, он рӯз расман санаи таъсиси Қувваҳои Мусаллаҳи Ҷумҳурии Тоҷикистон эълон шуд.

Муовини директори Китобхонаи миллии Тоҷикистон Ҷалолуддин Нурзода афсарону сарбозони шуҷои Ватанро бо фарорасии Рӯзи Қувваҳои мусаллаҳи Ҷумҳурии Тоҷикистон шодбош гуфта,  зикр намуд, ки ҳимояи Ватан барои ҳар шаҳрванди мамлакат, бахусус ҷавонон қарзи шаҳрвандӣ мебошад. Аз ин рӯ ин қишри ояндасози ҷомеаро зарур аст, ки илму дониш омӯзад ва ҳамеша марзу буми худро ҳимоя намуда, ба ин сарзамин содиқона хизмат намояд.

«Ҳифзи Ватан, музаффариятҳои истиқлолияти давлатӣ, ҳаёти орому осоиштаи мардум ва таъмини амнияту суботи давлат вазифаи ҳар як шаҳрванд аст. Иҷрои ин амали пуршараф ба ҷавононе насиб мегардад, ки дар қалбашон меҳру муҳаббат нисбат Ватан-Модар маскан гирифта бошад,- афзуд номбурда.

Раиси Иттиҳодияи интернатсионалистони собиқадори Ҷумҳурии  Тоҷикистон Шавкат Мирзоев иброз дошт, ки воқеан, артиш зода ва ҳамқадами Истиқлолияти давлатӣ ба ҳисоб меравад. Бино ба қавли номбуда, мақсад аз таъсис додани Артиши миллӣ ташкили неруи ҳарбие буд, ки ба ҳифзи истиқлолияту озодии мамлакат  қодир бошад ва якпорчагиву тамомияти арзии онро таъмин намояд.

Гузашти садсолаҳо нишон дод, ки бо шарофати далериву шуҷоат ва фидокориву ҷоннисориҳои ҳизматчиёни ҳарбӣ – фарзандони бонангу номуси Ватан дар Тоҷикистон ҳокимияти қонунӣ барқарор гардида, барои сулҳу субот заминаи мусоид фароҳам оварда шуд.

Февраль 21, 2020 14:15

Хабарҳои дигари ин бахш

«МАНЗАРНИГОР». Таҳти чунин унвон дар Осорхонаи миллии Тоҷикистон намоиш ифтитоҳ гардид
Нашриёти «Адиб» якчанд китобчаҳои бачагонаро ба нашр расонид
Дар Душанбе намоиш-фурӯши китобчаҳои кӯдакона доир гардид
«Маориф ва илм. Инъикос ва баррасии муҳимтарин масоили иҷтимоӣ дар паёмҳои Пешвои миллат», — шарҳи матбуоти даврии Тоҷикистон
Скрипканавози турк Ҷиҳат Ашкин дар Тоҷикистон барномаи ҳунарӣ баргузор мекунад
Ҳунармандони Сирки давлатии Тоҷикистон ба Туркия ва Покистон сафар намуданд
Дар вилояти Хатлон мониторинги барномаҳои соҳавӣ гузаронида шуд
Дар Коллеҷи тиббии Ваҳдат даври шаҳрии озмуни «Фурӯғи субҳи доноӣ китоб аст» ҷараён дорад
Ансамбли давлатии рақсии «Зебо» барои иштирок дар Фестивали байналмилалии «Рақси лазгӣ» ба Тошканд сафар намуд
Дар Донишгоҳи давлатии Хоруғ бахшида ба 30-солагии таъсиси он озмун оғоз гардид
«Душанбе. Шаҳре, ки шукӯҳи давлат ва симои миллатро таҷассум мекунад», — шарҳи матбуоти даврии Тоҷикистон
Филми кӯтоҳи «Этюд» дар Фестивали 45-уми байналмилалии Гризлони Олмон иштирок мекунад