ИМТИҲОНҲОИ МАРКАЗОНИДАИ ДОХИЛШАВӢ. Арзиши хизматрасонии он муқаррар гардид

Февраль 27, 2020 15:00

ДУШАНБЕ, 27.02.2020. /АМИТ «Ховар»/. Маркази миллии тестии назди Президенти Ҷумҳурии Тоҷикистон дар мувофиқа бо Хадамоти зиддиинҳисории назди Ҳукумати Ҷумҳурии Тоҷикистон ба диққати шахсоне, ки барои иштирок дар имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбӣ дар соли 2020 аз қайд гузаштан мехоҳанд, мерасонад, ки арзиши хизматрасонӣ барои довталабон дар имтиҳонҳои мазкур муайян ва муқаррар гардид.

Тавре ба хабарнигори АМИТ «Ховар» аз Маркази миллии тестӣ  иттилоъ доданд, тибқи тартиби муқарраркардаи Ҳукумати Ҷумҳурии Тоҷикистон арзиши хизматрасонӣ дар ИМД-2020 бо дарназардошти марҳалаҳои асосӣ ва иловагии бақайдгирӣ ва аз навбақайдгирии довталабон чунин муқаррар гардидааст:

Барои шахсони дорои таҳсилоти миёнаи умумӣ, хатмкунанда ё хатмкардаи синфи 11-ум, ибтидоӣ ё миёнаи касбӣ 210 (дусаду даҳ) сомонӣ. Инчунин барои шахсони дорои таҳсилоти умумии асосӣ, хатмкунанда ё хатмкардаи синфи 9 — 160 (яксаду шаст) сомонӣ ва барои марҳалаи асосии азнавбақайдгирӣ ҷиҳати иваз кардани интихобҳои аввалӣ ва азнавбақайдгирӣ барои иштирок дар тақсимоти такрорӣ 25 (бисту панҷ) сомонӣ муқарар намуданд.

Тибқи тартиби муқарраргардида, шахсони то 21-солае, ки ятими кулл ё бепарасторанд, аз пардохти маблағ барои хизматрасонӣ дар ИМД озод мебошанд.

Инчунин шахсони то 21-солае, ки падар ё модарашон вафот кардааст ё дар парастории яке аз онҳоянд, маъюбони гурӯҳҳои 1-уму 2-юм ва кӯдакони маъюб аз пардохти 50%- и маблағ барои хизматрасонӣ дар ИМД озод мебошанд.

Агар шахс ҳам маъюби гурӯҳи 1 ё 2 ё кӯдаки маъюб бошаду ҳам падар ё модараш вафот карда бошад, ё дар парастории яке аз онҳо қарор дошта бошад, он гоҳ ӯ аз пардохти маблағ барои хизматрасонӣ дар ИМД озод аст.

Ҳамчунин агар шахс ҳам маъюби гурӯҳи 1-ум ё 2-юм ё кӯдаки маъюб бошаду ҳам падар ё модараш вафот карда бошад, ё дар парастории яке аз онҳо қарор дошта бошад, он гоҳ ӯ аз пардохти маблағ барои хизматрасонӣ дар ИМД озод мебошад.

Шахси аз пардохти 50%-и маблағ барои хизматрасонӣ дар ИМД озодбуда агар дорои таҳсилоти умумии асосӣ, хатмкунанда ё хатмкардаи синфи 9 бошад, 80 (ҳаштод) сомонӣ ва агар шахси мазкур дорои таҳсилоти миёнаи умумӣ, ибтидоӣ ё миёни касбӣ бошад, он гоҳ 105 (яксаду панҷ) сомонӣ пардохт мекунад.

Бояд тазаккур дод, ки шахси хоҳишманди иштирок дар ИМД-2020 бояд маблағро барои хизматрасонӣ дар яке аз филиалҳои Бонки давлатии амонатгузории Ҷумҳурии Тоҷикистон «Амонатбонк» пешакӣ пардохт карда, расиди аз филиал ба ӯ додашударо бо ҳуҷҷатҳои дигари зарурӣ ба корманди нуқтаи бақайдгирӣ пешниҳод намояд.

Маълумоти муфассалро дар бораи бақайдгирӣ аз дастури иттилоотию методии «Роҳнамои довталаб», ки шакли чопии онро Марказ ба муассисаҳои таълимӣ ройгон дастрас гардонида, гунаи электронияшро дар сомонаи Маркази миллии тестӣ ҷой додааст, пайдо кардан мумкин аст. Инчунин макони бақайдгирӣ ва филиалҳои Бонки давлатии амонатгузории Ҷумҳурии Тоҷикистон «Амонатбонк» дар сомона ҷой дода шудаанд.

Февраль 27, 2020 15:00

Хабарҳои дигари ин бахш

Барои мукофотонидани ғолибони Озмуни ҷумҳуриявии «Шоҳномахонӣ» 2 миллиону 660 ҳазор сомонӣ ҷудо карда мешавад
ТУҲФАИ АРЗАНДАИ ПРЕЗИДЕНТИ ТОҶИКИСТОН. Ба беш аз 57 ҳазор оилаи шаҳри Ваҳдат «Шоҳнома» тақдим мегардад
ИЛМ ДАР БАЛАНДИИ ЗИЁДА АЗ 5000 МЕТР. Дар калонтарин пиряхи Тоҷикистон — Ванҷях таҳқиқоти илмӣ гузаронида шуд
Академияи миллии илмҳои Тоҷикистон бо Донишгоҳи давлатии омӯзгории Шинҷони Чин ҳамкориро тақвият медиҳад
Ёдгориҳои нодири тамаддуни тоҷикон дар Осорхонаи миллии Чин ба намоиш гузошта шуданд
Аз ҷониби нашриёти «Адиб» чор китоб ба нашр расид
Туҳфаи арзишманди Пешвои миллат — китоби «Шоҳнома» ба ноҳияи Файзобод расид
Байни консерваторияҳои Тоҷикистон ва Чин Ёддошти тафоҳум ба имзо расид
Намояндагони Шурои байналмилалии ҳунармандӣ бо намунаҳои сӯзании Панҷакент шинос шуданд
Сокинони шаҳри Роғун соҳиби туҳфаи Президенти Тоҷикистон — «Шоҳнома»-и Абулқосим Фирдавсӣ гардиданд
«АНДАЛЕБ-2025». Дар Панҷакент даври шаҳрии фестивал- озмуни ҷумҳуриявии телевизионӣ доир шуд
Намояндаи Тоҷикистон дар ҳамоиши тарғибгарони илм дар Чин иштирок намуд