Сафири Тоҷикистон ба Шоҳи Норвегия Ҳаралди V эътимоднома супорид

ДУШАНБЕ, 18.02.2020 /АМИТ «Ховар»/. 13 феврал дар Осло Сафири Фавқулода ва Мухтори Ҷумҳурии Тоҷикистон дар Подшоҳии Норвегия (бо қароргоҳ дар Вена)  Идибек Қаландар эътимодномаи худро ба Шоҳи Норвегия Ҳаралди V супорид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Дар суҳбате, ки пас аз анҷоми маросими супоридани эътимоднома сурат гирифт, Сафири Тоҷикистон ба Шоҳи Норвегия паёми шодбоши Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро расонида, омодагии ҷониби Тоҷикистонро ба таҳкими бештари ҳамкории мутақобилан судманд бо Норвегия изҳор дошт.

Ҷонибҳо инчунин роҷеъ ба самтҳои муҳими ҳамкорӣ миёни Тоҷикистон ва Норвегия дар чаҳорчӯби созмонҳои байналмилалӣ мубодилаи афкор намуданд.

Акс аз сомонаи ВКХ ҶТ