Миёни вазоратҳои тандурустии кишварҳои узви ИДМ видеоконфронс оид ба вазъи cирояти коронавирус доир шуд

ДУШАНБЕ, 19.03.2020 /АМИТ «Ховар»/. Имрӯз миёни як зумра вазоратҳои тандурустии кишварҳои  Иттиҳоди Давлатҳои Мустақил оид ба вазъи сирояти коронавирус дар давлатҳои минтақа видеоконфронс доир гардид.  Дар он муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Мирҳамуддин Камолзода  иштирок намуд.

Тавре аз Вазорати тандурустӣ ва ҳифзи иҷтимоии аҳолии мамлакат ба АМИТ «Ховар» хабар  доданд, дар видеоконфронси мазкур  намояндагони вазоратҳои тандурустии  Федератсияи Россия, ҷумҳуриҳои Тоҷикистон, Ӯзбекистон, Қазоқистон, Қирғизистон, Беларус, Арманистон иштирок  намуда, вобаста ба вазъи сирояти коронавирус дар кишварҳояшон маълумот доданд.

Зимни видеоконфронс зикр  шуд, ки то 19 март дар миқёси кишварҳои  ИДМ 450 ҳолати гирифторӣ ба сирояти коронавирус, аз ҷумла дар Россия 147, Арманистон 110, Беларус 51, Молдавия 36, Қазоқистон 35, Озарбойҷон 34, Украина 16, Ӯзбекистон 18 ва дар Қирғизистон 3 ҳолат ба қайд гирифта шудаанд. То кунун дар Ҷумҳурии Тоҷикистон ва Туркманистон коронавирус ба қайд гирифта нашудааст.

Дар идома иштирокчиёни видеоконфронс вобаста ба паҳлуҳои дигари масъала табодули афкор намуданд.

Имрӯз  ба даҳгонаи кишварҳое, ки дар онҳо теъдоди зиёди гирифторони коронавирус ба қайд гирифта шудааст, Ҷумҳурии Мардумии Чин (беш аз 80,9 ҳазор), Италия (беш аз 35,7 ҳазор), Эрон (беш аз 17,3 ҳазор), Испания (беш аз 14,7 ҳазор), Германия (беш аз 12,3 ҳазор), ИМА (беш аз 9,4 ҳазор), Франсия (беш аз 9,1 ҳазор), Кореяи Ҷанубӣ (беш аз 8,5 ҳазор), Швейтсария (беш аз 3,1 ҳазор) ва Британияи Кабир (беш аз 2,6 ҳазор) дохил мешаванд.

Ёдовар мешавем, ки  дар ҷаҳон беш аз 219 ҳазор нафар ба коронавирус гирифтор шудаанд, ки аз ин шумора беш аз 8,9 ҳазор нафар вафот карда, зиёда аз 85,7 ҳазор кас шифо ёфтаанд ва беш аз 6,8 ҳазор нафар дар ҳолати вазнин қарор доранд.