ПАЙРАВӢ БА ТАШАББУСИ ПЕШВОИ МИЛЛАТ. Вакили Маҷлиси намояндагон ба беморхонаи сироятии шаҳри Ҳисор кӯмак намуд

ДУШАНБЕ, 12.05.2020 /АМИТ «Ховар»/. Иқдоми Пешвои муаззами миллат муҳтарам Эмомалӣ Раҳмон дар мавриди расонидани кумаки пулию молиявӣ ҷиҳати пешгирии бемории каронавирус ва табобати мубталоёни ин беморӣ дар шаҳри Ҳисор низ ҷонибдории ҳаматараа ёфта, кумаку хайрҳои шахсони саховатпеша пайваста ба назар мерасанд, менависад хабарнигори АМИТ «Ховар» Марзия САИДЗОДА.

Вакили Маҷлиси намояндагони Маҷлиси Олии Ҷумҳурии Тоҷикистон Сураё Уроқова ба табибону кормандони Беморхонаи бемориҳои сироятии шаҳри Ҳисор  маводи хӯрокӣ- орд, равған, биринҷ, макарон кумак намуд. Вакили  палатаи поёнии Парлумони мамлакат ҳамзамон  бо табибон, хешону пайвандони беморон суҳбат намуда, ба онҳо риоя кардани талаботи тарзи ҳаёти солимро фаҳмонид. Ҳамзамон аз дастгирии пайвастаи Ҳукумати мамлакат ёдовар шуда, ҳамагонро ба сабру таҳаммул ва сарҷамъию мубориза бо ин беморӣ даъват намуд.

Инчунин корҳои хайру савоби анҷомдодаи инсонҳои хайрхоҳ  дар шаҳри Ҳисор  Нурмуҳаммад Аҳмадзода,  директори ҶДММ «Қоғази Шарора» Фарҳодҷон Шаробов, директори бозори «Самоҳ»  Мақсуд Солиев, Фотеҳҷон Ашӯров — соҳибкоре, ки ба Беморхонаи марказии шаҳр як дастгоҳи таъминкунандаи нафаси сунъӣ дастрас намудааст ва даҳҳо нафарони дигаре, ки дар роҳи наҷоти миллат аз ин бемории сироятӣ корҳои хайру савоб анҷом дода, зикри номашонро ҷоиз намедонанд, шоистаи таҳсин мебошанд.

Дастгирии ятимону бепарасторон, маъюбону мардуми камбизоат дар ин рӯзҳои душвор,  табобати беморони сироятёфта ба як самти муҳими сиёсати Ҳукумати Ҷумҳурии  Тоҷикистон табдил ёфтааст ва дар партави ин сиёсат дар шаҳри Ҳисор низ пайваста амалҳои нек анҷом меёбанд.Сокинони шаҳр  минбаъд низ азми онро доранд, ки бо анҷом додани корҳои хайру савоб  дар рафъи ин бемории сирояткунанда саҳм гузоранд.