Андешаҳои профессор Зайналобиддин Кобулиев вобаста ба нақши Тоҷикистон дар ҳалли мушкилоти об дар барномаи таҳлилии «Сарват» аз Радиои «Ховар»

ДУШАНБЕ, 29.06.2020. /АМИТ «Ховар»/. Ҷумҳурии Тоҷикистон нахустин ташаббуси глобалии экологиро маҳз дар масъалаи об пешниҳод намудааст. Тоҷикистон яке аз кишварҳое ба ҳисоб меравад, ки дорои захираҳои зиёди обӣ буда, ҳамасола дар ҳудуди он 64 млрд. м³ об ҳосил мешавад, ки 60% — и оби ҳавзаи баҳри Аралро ташкил медиҳад. Пешниҳоди Президенти Ҷумҳурии Тоҷикистон муҳтарам Эмомалӣ Раҳмон дар Иҷлосияи 54 — уми Маҷмаи Умумии СММ оид ба эълон намудани соли 2003 — Соли байналмилалии оби тоза, ки 1 октябри соли 1999 сурат гирифта буд, қадами нахустини Тоҷикистон дар масъалаи об гардид. Ба андешаи доктори илмҳои техникӣ, профессор Зайналобиддин Кобулиев, директори Институти масъалаҳои об, гидроэнергетика ва экологияи Академияи миллии илмҳои Тоҷикистон маҳз кӯшишҳои Сарвари давлат муҳтарам Эмомалӣ Раҳмон буд, ки имрӯз Тоҷикистон ба яке аз кишварҳои ташаббускори ҳалли мушкилоти об шинохта мешавад.

Тафсилоти бештари мавзӯъ вобаста ба нақши Тоҷикистон дар ҳалли мушкилоти об соатҳои 10:30, 14:30 ва 20:30 дар барномаи таҳлилии «Сарват»– и Радиои «Ховар» бо иштироки доктори илмҳои техникӣ, профессор Зайналобиддин Кобулиев, директори Институти масъалаҳои об, гидроэнергетика ва экологияи Академияи миллии илмҳои Тоҷикистон дар таҳияи муҳаррири барнома Манижа Баҳромзода пешниҳоди шунавандагон мегардад.

АКС аз бойгонии АМИТ «Ховар»