Таҳти раёсати муовини Сарвазир ҷаласаи комиссияи ҷумҳуриявӣ оид ба интихоб ва тайёр намудани кадрҳо дар муассисаҳои таҳсилоти олӣ ва илмии давлатҳои хориҷӣ баргузор гардид

Июнь 23, 2020 19:32

ДУШАНБЕ, 23.06.2020 /АМИТ «Ховар»/.Имрӯз дар толори Вазорати маориф ва илми Ҷумҳурии Тоҷикистон таҳти раёсати муовини Сарвазири мамлакат, раиси Комиссияи ҷумҳуриявӣ оид ба интихоб ва тайёр намудани кадрҳо дар муассисаҳои таҳсилоти олӣ ва илмии давлатҳои хориҷӣ Ширин Исматуллозода ҷаласаи комиссия баргузор гардид, хабар медиҳад АМИТ «Ховар» бо истинод ба Маркази матбуоти вазорат.

Ба иттилои манбаъ, дар ҷаласа аъзои комиссия — намояндагони Дастгоҳи иҷроияи Президенти Ҷумҳурии Тоҷикистон ва роҳбарони як зумра вазорату кумитаҳои дахлдори кишвар ширкат намуданд.

Дар ҷаласа вобаста ба вазъи раванди қабули довталабон ба муассисаҳои таҳсилоти олӣ ва илмии давлатҳои хориҷӣ аз ҳисоби бурсияҳои давлатҳои хориҷӣ, маблағҳои буҷетӣ, Стипендияи байналмилалии Президенти Ҷумҳурии Тоҷикистон «Дурахшандагон» ва густариши ҳамкорӣ бо давлатҳо гузориши директори Маркази барномаҳои байналмилалӣ Исматулло Шодиён, вобаста ба ҳолати баргардонидани маблағҳои буҷетӣ аз ҷониби хатмкардагони муассисаҳои таҳсилоти олӣ ва илмии давлатҳои хориҷӣ, ки ба ҷойи кор ҳозир нашудаанд, гузориши муовини якуми вазири маориф ва илм Муҳаммаддовуд Саломиён, вобаста ба масъалаи густариш додани муносибатҳои байни донишҷӯёни тоҷик, ки дар хориҷи кишвар таҳсил менамоянд ва ҳамкории густурдаи онҳо бо намояндагиҳои дипломативу консулии Ҷумҳурии Тоҷикистон, гузориши сардори раёсати муносибатҳои байналмилалии Вазорати маориф ва илм Илҳом Камолзода шунида шуд.

Аз ҷумла, иттилоъ дода шуд, ки дар соли таҳсили 2020-2021 ҷиҳати таҳсил дар муассисаҳои таҳсилоти олии касбии хориҷи кишвар аз ҷониби Федератсияи Россия, ҷумҳуриҳои Озарбойҷон, Венгрия, Руминия, Беларус, Қазоқистон, Украина, Туркия ва Австрия барои шаҳрвандони Ҷумҳурии Тоҷикистон бурсияҳои таҳсилӣ ҷудо гардидааст.

Зимни баррасии масъалаҳо роҳбарони як зумра вазорату кумитаҳо, аз ҷумла вазири маориф ва илм Муҳаммадюсуф Имомзода, вазири меҳнат, муҳоҷират ва шуғли аҳолӣ Гулрӯ Ҷабборзода, роҳбарони вазоратҳои корҳои хориҷӣ, тандурустӣ ва ҳифзи иҷтимоии аҳолӣ, кумитаҳои ҷавонон ва варзиш, занон ва оила ва дигарон ба музокира баромада, фикру андеша ва таклифу пешниҳодоти худро иброз доштанд.

Дар охир раиси комиссия вобаста ба таҷдиди назар намудани тартиби қабули донишҷӯён ба муассисаҳои таҳсилоти олӣ ва илмии хориҷи кишвар, назорати раванди таҳсили донишҷӯёни тоҷик дар муассисаҳои таълимии кишварҳои хориҷӣ, баъд аз таҳсил баргардонидан ва бо ҷойи кор таъмин намудани донишҷӯёне, ки дар асоси бурсияҳо таҳсил намудаанд ва чанде дигар ба масъулин дастуру супоришҳои мушаххас дод.

Июнь 23, 2020 19:32

Хабарҳои дигари ин бахш

Тоҷикистон ва Узбекистон ҷиҳати омода намудани мутахассисони сатҳи баланд Ёддошти тафоҳуми ҳамкорӣ ба имзо мерасонанд
Соҳибкорони Истаравшан ба сокинони зарардидаи наздисарҳадӣ кумак намуданд
Дар Хуҷанд доир ба пешгирии зӯроварӣ дар оила мулоқот баргузор гардид
Дар Хоруғ пешгирии зӯровариро дар оила муҳокима карданд
БО ҲАМЛАИ НИЗОМИЁНИ ҚИРҒИЗ МО ҲАРГИЗ ТАРКИ ЗАМИНИ АҶДОДӢ НАМЕКУНЕМ. Чунин изҳор менамояд бо ифтихори ватандорӣ сокини 60-солаи деҳаи Хоҷаи Аълои Исфара Абдукарим Шарифзода
COVID-19. Ба Тоҷикистон беш аз ду миллион воя ваксинаи «КоронаВак» ворид гардид
МАҲКУМИЯТИ 10-СОЛА БАРОИ САРКАШӢ АЗ ХИЗМАТИ ҲАРБӢ. Думаи давлатии Федератсияи Россия ба ҷазо барои ҷиноят дар замони ҷанг тағйирот ворид намуд
ҲАМЛАИ ТАҶОВУЗКОРОНАИ ҚИРҒИЗИСТОН. Барои барқарорсозии хонаҳои сокинони деҳоти Овчиқалъача ва Хистеварзи ноҳияи Бобоҷон Ғафуров ситоди махсус ташкил мешавад
ҲАМЛАИ ТАҶОВУЗКОРОНАИ ҚИРҒИЗИСТОН. Куштори кӯдакону табибон ва мардуми осоишта сахттарин ҷиноят аст,- Садриддин Ҳасанзода, узви Иттифоқи нависандагони Тоҷикистон
ҲАМЛАИ ТАҶОВУЗКОРОНАИ ҚИРҒИЗИСТОН. Қирғизтаборони ноҳияи Мурғоб: «Тоҷикистон дар ягон ҳолат бо миллату халқияте муносибати неки ҳамсоядориро вайрон накардааст»
ҲАМЛАИ ТАҶОВУЗКОРОНАИ ҚИРҒИЗИСТОН. Раиси Вилояти Мухтори Кӯҳистони Бадахшон изҳори таслияти Пешвои миллатро ба наздикони қурбониёни муноқишаҳои марзӣ расонид
ОИЛАИ СОЛИМ-ҶОМЕАИ СОЛИМ. Кумитаи кор бо ҷавонон ва варзиш Конференсияи илмӣ – назариявӣ доир намуд