Сарвари давлат Эмомалӣ Раҳмон дар ноҳияи Деваштич Беморхонаи ноҳиявии №5-ро ифтитоҳ намуданд

Июль 1, 2020 10:18

ДУШАНБЕ, 01.07.2020 /АМИТ «Ховар»/. Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рӯзи дуюми сафари кории худ ба шаҳру ноҳияҳои вилояти Суғд дар деҳаи Далёни поёни ноҳияи Деваштич бо бардоштани парда аз рӯйи лавҳи рамзӣ Беморхонаи ноҳиявии №5-ро ифтитоҳ намуданд.

Ба Пешвои миллат иттилоъ дода шуд, ки корҳои бунёдӣ дар бинои беморхона моҳи марти соли 2018 аз ҷониби соҳибкори ватанӣ Садрӣ Файзиев оғоз гардида, он дар муҳлати муайяншуда бо тарҳу намои зебо мавриди истифода қарор гирифт ва барои 60 нафар шароити корӣ фароҳам орварда шуд.

Беморхонаи мазкур дорои 4 ошёна буда, аз шуъбаҳои таваллуд, қабул ва таҳлилгоҳ бо маҷмӯи гузаронидани амалиёти ҷарроҳӣ, утоқи хатнаи кӯдакон, касалиҳои узвҳои дарунӣ ва бачагона иборат мебошад.

Маркази саломатӣ бо дастгоҳу таҷҳизоти муосири тиббӣ аз қабили дастгоҳи нафасдиҳии сунъӣ (ИВЛ), кардиомонитор, дастгоҳи ташхиси ултрасадо ва дигар технологияи муосири ташхису табобат ҷиҳозонида шудааст.

Дар баробари васлу насби беҳтарин технологияи тиббӣ, инчунин дар ошёнаҳои якум ва дуюми беморхона гӯшаи гиёҳдармонӣ фаъолият менамояд, ки мутахассисон бо истифода аз гулу растаниҳои шифобахши ватанӣ имкон доранд, маризонро ба ин намуди табобат низ фаро гиранд.

Ҳуҷраҳои беморхона маҷмӯан дорои 75 кат буда, барои бе мушкилӣ гузаронидани мавсими сармо ҳар яке бо шабакаи мутамаркази гармидиҳӣ ва хати озоди барқ пайваст карда шудаанд.

Президенти Ҷумҳурии Тоҷикистон муҳтарам Эмомалӣ Раҳмон пас аз шиносоӣ бо шароити кору фаъолият дар беморхонаи мазкур, ба сифати корҳои сохтмонӣ баҳои баланд дода, қомат афрохтани чунин бинои хуштарҳро барои сокинони ҷамоати Далёни болои ноҳияи Деваштич ва атрофи он туҳфаи арзишманд дар солгарди навбатии Ваҳдати миллӣ арзёбӣ намуданд.

Акнун, ки вазъи хизматрасонии мутахассисон дар беморхона минбаъд дар шароити ҷавобгӯ ба меъёрҳои имрӯза сурат мегирад, Пешвои миллат онҳоро барои расонидани кумаки босифати тиббӣ ба сокинони ноҳия ҳидоят карданд.

Барои ба пуррагӣ анҷом додани корҳои бунёдӣ дар беморхонаи мазкур саҳмгузории дигар шахсони саховатпешаи деҳот низ назаррас арзёбӣ мегардад. Масъулияти баланди худшиносии миллӣ ва дар иҷрои ин амал камари ҳиммат бастани соҳибкорони ҷамоати Далёни болои ноҳияи Деваштич аз иқдому ташаббусҳои созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маншаъ гирифта, қомат афрохтани бинои хуштарҳу замонавӣ ва дастрасии бештар аз 26 ҳазор сокини ҷамоат ба хизматрасонии тиббӣ натиҷаи ҳамин пайравӣ ба ташаббусҳои созандаи Роҳбари давлат аст.

Тарҳи зебои иморати навсохт, роҳравҳои сафолакпӯш, фаввораҳои ранга ва саҳни бо дарахтони сояафкану гулҳои ороишӣ зинатёфтаи бинои муассисаи тандурустӣ ба ҳусни деҳоти дурдасти кишвар шукуҳи хосае мебахшад.

Ба Сарвари давлат иттилоъ дода шуд, ки муассисаи тандурустии навсохту замонавӣ ба тавозуни мақомоти иҷроияи ҳокимияти давлатии ноҳияи Деваштич гузаронида мешавад.

Пешвои миллат муҳтарам Эмомалӣ Раҳмон ба аъзои оилаи соҳибкор Садрӣ Файзиев ва дигар шахсони ватандӯсти деҳот, ки бо бунёди беморхонаи замонавӣ шароити мусоиди фаъолият ва дастрасии сокинон ба хизматрасонии тиббиро таъмин кардаанд, изҳори сипосу миннатдорӣ намуда, анҷоми чунин эҳсонкориҳоро ба нафъи миллату ҷомеа ва амали ҷавонмардона арзёбӣ намуданд.

Ифтитоҳи Беморхонаи ноҳиявии №5 дар ҷамоати Далёни болои ноҳияи Деваштич 01.07.2020

Июль 1, 2020 10:18

Хабарҳои дигари ин бахш

Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Туркия Реҷеп Тайип Эрдоган суҳбати телефонӣ анҷом доданд
Маҷлиси Ҳукумати Ҷумҳурии Тоҷикистон баргузор гардид
ПАЁМИ ШОДБОШИИ Президенти Тоҷикистон, Пешвои миллат муҳтарам Эмомалӣ Раҳмон ба муносибати иди Қурбон
Президенти Ҷумҳурии Тоҷикистон Эмомалӣ Раҳмон ба Президенти Ҷумҳурии Қирғизистон Сооронбай Жээнбеков барқияи изҳори тасаллӣ ирсол намуданд
МУРОҶИАТНОМАИ Ҳукумати Ҷумҳурии Тоҷикистон ба мардуми кишвар
Пешвои миллат Эмомалӣ Раҳмон аз Кооперативи истеҳсолии «Сомонҷон», хоҷагиҳои деҳқонии «Фатҳиддин» ва «Барно» дар ноҳияи Данғара боздид намуданд
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Ӯзбекистон Шавкат Мирзиёев суҳбати телефонӣ анҷом доданд
Фармони Президенти Ҷумҳурии Тоҷикистон дар бораи аз вазифаи судяи суди вилояти Суғд озод намудани Сангинзода Ҷ.А.
Президенти мамлакат Эмомалӣ Раҳмон аз намоишгоҳи маҳсулоти кишоварзӣ ва заминҳои хоҷагии ёрирасони деҳоти Фалакон боздид намуданд
Сарвари давлат Эмомалӣ Раҳмон дар ноҳияи Рӯдакӣ бо тарзи истифодаи самараноки замини наздиҳавлигии оилаи Усмоновҳо шинос шуданд
Пешвои миллат Эмомалӣ Раҳмон дар шаҳри Ҳисор Корхонаи истеҳсоли қубур ва профилҳои тоҷикро ифтитоҳ карданд
Президенти Тоҷикистон Эмомалӣ Раҳмон аз хоҷагиҳои деҳқонии «Файзи деҳқон» ва «Файзи Ҳоҷӣ»-и шаҳри Ҳисор дидан намуданд