Дар ноҳияи Темурмалик кишти такрории зироат вусъат меёбад

ТЕМУРМАЛИК, 10.08.2020 /АМИТ «Ховар»/. Дар ноҳияи Темурмалик заминҳои корами обӣ нисбат ба дигар ноҳияҳои водии Кӯлоб камтаранд ва кишоварзон солҳои охир аз онҳо самаранок истифода мебаранд. Имсол бо дастгирии Мақомоти иҷроияи ҳокимияти давлатии ноҳия  хоҷагиҳои деҳқонию инфиродӣ майдони кишти такрориро дар заминҳои корами обӣ васеъ менамоянд.

Ин раванд дар хоҷагии «Ваҳдат»-и ноҳия, ки аксари заминҳои он корами обӣ мебошанд, баръало ба чашм мерасад. Саҳмдорони ин хоҷагӣ ҳанӯз як моҳ пеш ба ҷамъоварии ғалладонагӣ ва маҳсулоти барвақтӣ шурӯъ намуда, аллакай дар бештари заминҳо ҷуворимаккаю лӯбиёгӣ, шолӣ, помидору бодиринг ва дигар намуди сабзавот кишт кардаанд.

Тавре роҳбари хоҷагии  «Ваҳдат»  Муҳаммадсалим Вализода иттилоъ дод, онҳо бо дастгирии мақомоти иҷроияи ҳокимияти давлатии ноҳия аз оғози мавсим каналу ҷӯйҳоро тоза карданд, то кишоварзон зимни дастрасӣ ба оби полезӣ мушкилӣ накашанд. Ин амал деҳкононро ба гузаронидани кишти такрорӣ дилгарм кард.

Дар ҷамоати шаҳраки Совет низ баъди ҷамъоварии ҳосили ғалла мақсад доранд майдони кишти такрориро нисбат ба нақшаи дурнамо зиёд намоянд ва дар ин самт корҳо ҷараён доранд.