Конфронси VII байналмилалии «Масъалаҳои муосири физика» дар Душанбе тариқи онлайн баргузор мешавад

Сентябрь 28, 2020 10:20

ДУШАНБЕ, 28.09.2020 /АМИТ «Ховар»/. 9-10 октябр дар Донишкадаи  физика ва техникаи ба номи С. Умарови Академияи миллии илмҳои Ҷумҳурии Тоҷикистон Конфронси VII байналмилалии «Масъалаҳои муосири физика» баргузор мешавад. Дар ин бора аз донишкадаи мазкур  хабар додаанд.

Конфронси байналмилалӣ баъд аз соли 2008 маъмулан дар ду сол як маротиба доир мешавад.

Бо дарназардошти таъсири ҷаҳонии пандемияи COVID-19 аз тарафи кумитаи илмӣ ва ташкилӣ дар кори он баъзе тағйирот ворид шудааст: системаҳои фосилавӣ барои рӯнамоиҳо ва мубоҳисаҳо, инчунин бахши иловагии «Физикаи тиббӣ ва биологӣ» пешниҳод шуданд.

Дар ҷараёни конфронс шунидан ва муҳокимаи зиёда аз 100 маърӯзаи илмӣ ба нақша гирифта шудааст, ки аз ҷумла беш аз 30-тои онҳо аз пажӯҳишгоҳҳо ва донишгоҳҳои кишварҳои узви ИДМ, ИМА ва дигар кишварҳои хориҷӣ ворид шудаанд.

Бино ба гуфтаи директори Донишкадаи физика ва техникаи ба номи С. Умарови Академияи миллии Тоҷикистон Фарҳод Шокир, маводи воридшуда аз маърӯзаҳои ба масъалаҳои физикаи плазма, физикаи нимноқилҳо, физикаи назариявӣ, мониторинги радиатсионии маҳал, таҳлили маҳсулоти хӯрокворӣ барои муайян намудани мавҷудияти унсурҳои зараровар, тағирёбии иқлим, коркарди маводи нанокомпозитӣ, манбаҳои барқароршаванда ва ғайримаъмулии неруи барқ, булӯршиносӣ, уфунати коронавируси нави COVID-19, физикаи ноқилҳои фавқулода ва ғайра бахшидашуда иборат мебошад.

«Дар Кумитаи тадорукоти конфронс беш аз 40 нафар олимон ва мутахассисон, аз ҷумла намояндагони Британияи Кабир, Исроил, Қазоқистон, Россия ИМА, Туркия, Ӯзбекистон, Украина ва дигар кишварҳо шомил мебошанд. Сарфи назар аз маҳдудияти вобаста ба пандемия, мо бояд аз тамоми имконот  ҷиҳати таъмини фаъолияти муттасили илмӣ-тадқиқотӣ истифода намоем. Бо сабаби вазъияти мавҷуда, мо натавонистем, ки олимони кишварҳои узви ИДМ, ИМА, Аврупо, инчунин Чин ва Японияро даъват кунем, аммо масоили илмӣ ва дурнамои ҳамкорӣ бо ширкати олимони хориҷӣ дар шакли онлайн муҳокима хоҳад шуд», — зикр намуд роҳбари донишкада.

Ба ақидаи ӯ, табиати илм танаффусро  таҳаммул намекунад, зеро ҳар рӯзи қатъ шудани ҷараёни таҳқиқоти илмӣ боиси талафи чанд рӯзи иловагӣ мешавад, чунки барои аз нав барқарор намудани таҳқиқот чанд рӯзи дигар лозим мешавад. Пас аз ҷамъбасти натоиҷи конфронс таҳияи маҷмӯаи мавод, маърӯзаҳои беҳтарини гузришҳо оид ба таҳқиқоти илмии иштирокчиёни хориҷӣ, ки сабаби дастовардҳои нави илмӣ ва коркардҳои амалии инноватсионӣ шудаанд ва интишори онҳо дар маҷаллаи илмии “Ахбори  АМИТ” ба нақша гирифта шудааст.

Сентябрь 28, 2020 10:20

Хабарҳои дигари ин бахш

Академияи миллии илмҳои Тоҷикистон ва Вазорати тандурустии Федератсияи Русия ҳамкориро тақвият медиҳанд
Сокинони ноҳияи Исмоили Сомонии пойтахт соҳиби туҳфаи Президенти Тоҷикистон — «Шоҳнома»-и Ҳаким Фирдавсӣ шуданд
Олимони ҷавони тоҷик дар машғулияти Мактаби байналмилалии тобистонаи Узбекистон иштирок доранд
Намоиши «Олами гулдӯзии тоҷикон» дар Осорхонаи миллии қолинҳои Озарбойҷон доир мегардад
«ТОҶИКИСТОН — ВАТАНИ АЗИЗИ МАН». Аз 25 то 30 сентябр даври сеюми озмуни ҷумҳуриявӣ баргузор мешавад
Дар нашриёти «Эр Граф» «Фарҳанги тафсирии истилоҳоти осорхонашиносӣ» аз чоп баромад
Оид ба омӯзиши таърих ва тамаддуни халқи тоҷик дар замони соҳибистиқлолӣ конфронси илмӣ баргузор гардид
ТУҲФАИ АРЗАНДАИ ПРЕЗИДЕНТИ ТОҶИКИСТОН. Тақдими китоби «Шоҳнома» ба беш аз 48 ҳазор оилаи шаҳри Ҳисор оғоз шуд
«ТОҶИКИСТОН — ВАТАНИ АЗИЗИ МАН». Даври сеюми озмуни ҷумҳуриявӣ моҳи сентябр оғоз мегардад
Дар остонаи ҷашни Истиқлоли давлатӣ китоби «Корномаҳои ҷовидонаи Пешвои муаззами миллат» аз чоп баромад
«Шоҳнома»-и Ҳаким Фирдавсӣ бузургтарин мактаб дар тарбияи худшиносии миллӣ мебошад
Муовини Сарвазири Беларус дар Осорхонаи миллии Тоҷикистон бо таъриху фарҳанги тоҷикон шинос гардид