Сармоягузорони Британияи Кабир аз МОИ «Кӯлоб» боздид намуданд

ДУШАНБЕ, 15.09.2020. /АМИТ «Ховар»/. Бо мақсади аз наздик шинос шудан бо имкониятҳои сармоягузорӣ ва дар ин замина бо ҷалби сармоягузорони Британияи Кабир бунёд намудани корхонаҳои нави саноатӣ дар ҳудуди Минтақаи озоди иқтисодии “Кӯлоб” сафари кории сармоягузорони ин давлат таҳти роҳбарии аъзои раёсати Анҷумани дӯстии Британия ва Тоҷикистон Сайҷалол Бадахшонӣ ва ҳайати роҳбарикунандаи ҶДММ “Заррин” ба Минтақаи озоди иқтисодии “Кӯлоб” анҷом дода шуд.

Зимнан меҳмононро роҳбари Маъмурияти минтақаи озоди иқтисодии “Кӯлоб” Мустафо Абдуллозода ҳамроҳӣ намуда, дар ин раванд ба онҳо имконият ва шароит фароҳам оварда шуд, ки бо ҳудуди ҷойгиршавии МОИ “Кӯлоб”, ки аз ҷониби Ҳукумати Ҷумҳурии Тоҷикистон дар масоҳати 309 га таъсис дода шудааст, аз наздик шинос гарданд.

Ҳамзамон дар доираи сафар меҳмонон ҷиҳати шиносоӣ бо имкониятҳои инфрасохторӣ ва коммуникатсионӣ аз фурудгоҳи байналмилалӣ, роҳи оҳан ва дигар мавзеъҳои таърихию фарҳангии шаҳри Кӯлоб боздид ба амал оварданд.

Инчунин ба сармоягузорон оид ба таъсиси МОИ “Кӯлоб”, имкониятҳои мавҷуда, мавқеи ҷуғрофӣ, инфрасохтор, имтиёзҳои андозию гумрукӣ, самтҳои афзалиятнок, тартиби бақайдгирии субъектҳо, тартиби сармоягузорӣ, иҷора ва муҳлатҳои он маълумоти муфассал пешниҳод карда шуд.

Ҳадафи асосии ташрифи сармоягузорон- ин ҷалби сармояи мустақими Британияи Кабир ба Ҷумҳурии Тоҷикистон, махсусан шаҳри Кӯлоб дар самти бунёди корхонаҳои нави саноатӣ, ки аз ҳадафи чоруми миллӣ, яъне саноатикунонии босуръати мамлакат сарчашма мегирад, маҳсуб мешавад.

Баъди боздид аз МОИ “Кӯлоб” меҳмонон бо раиси шаҳри Кӯлоб Абдуқодир Вализода вохӯрӣ анҷом дода, паҳлӯҳои гуногунҷабҳаи ҳамкориро мавриди таҳлилу баррасӣ қарор доданд.

Зимнан роҳбарияти шаҳр ҳавасмандии худро дар самти ҷалби сармояи Британияи Кабир ба иқтисодиёти шаҳри Кӯлоб иброз намуда, таъкид доштанд, ки мақомоти иҷроияи ҳокимияти давлатии шаҳри Кӯлоб барои ҳамкории судманд бо сармоягузорони дохилию хориҷӣ ҳамеша омода буда, барои таъсиси силсилакорхонаҳои нави саноатӣ, бахусус бо истифода аз имтиёзҳои андозию гумрукии МОИ «Кӯлоб» шароити мусоид фароҳам меоварад.