17 корхонаи саноатии Хуҷанд ба давлатҳои хориҷӣ ба маблағи 194,0 млн сомонӣ маҳсулот содирот намудаанд

ДУШАНБЕ, 27.10.2020. /АМИТ Ховар/. Давоми 9 моҳи соли равон аз ҷониби  17 корхонаи саноатии шаҳри Хуҷанд ба давлатҳои хориҷии дуру наздик ба маблағи 194,0 млн. сомонӣ маҳсулот содирот карда шуд, ки ҳиссаи он дар маҷмўи маҳсулоти саноатӣ 36,5 фоизро ташкил медиҳад.

Дар ин бора ба хабарнигори АМИТ “Ховар” дар вилояти Суғд аз хадамоти матбуоти раиси шаҳри Хуҷанд иттилоъ доданд.

Инчунин аз ҷониби 64 адад корхонаҳои хурду калон ба маблағи 309,1 млн. сомонӣ маҳсулоти воридотивазкунанда истеҳсол гардидааст, ки нисбат ба ҳамин давраи соли сипаригашта 65,8 млн. сомонӣ ё 27,0 фоиз зиёд мебошад.

Зикр гардид, ки мувофиқи нишондиҳандаҳои оморӣ, ҳаҷми умумии маҳсулоти истеҳсолгардида ба 1047,5 миллион сомонӣ расида, аз ҷониби корхонаҳои саноатӣ ба маблағи 397,0 млн. сомонӣ маҳсулот истеҳсол гардид. Он нисбат ба нишондиҳандаи соли сипаригашта 21,9 фоиз зиёд ва корхонаҳои хизматрасонии соҳаи саноат 145,2 млн. сомонӣ ё 18,1 фоиз зиёд мебошад.

Инчунин дар давраи паҳншавии пандемияи сироятии коронавирус баҳри таъминоти аҳолӣ ва муассисаҳои тандурустӣ аз ҷониби 13 корхонаи саноатӣ зиёда аз 4,2 млн. дона ниқобҳо, либоси махсуси тиббӣ ва маводи антисептикӣ ба маблағи зиёда аз 47,0 млн. сомонӣ истеҳсол карда шудааст, ки қаблан ин намуд мавод аз хориҷи мамлакат ворид мегардиданд.