Дар ноҳияи Ҷайҳун навсозии боғи муосири фарҳангӣ — фароғатӣ дар арафаи анҷомёбист

БОХТАР, 27.10.2020 /АМИТ «Ховар»/. Раиси вилояти Хатлон Қурбон Ҳакимзода  27 октябр аз ноҳияи Ҷайҳун боздид кард ва дар он ҷо бо ҷараёни навсозии боғи фарҳангию фароғатӣ шинос шуд, хабар медиҳад Мақомоти иҷроияи ҳокимияти давлатии вилояти Хатлон.

Навсозии боғ моҳи ноябри соли 2018 оғоз шуда, то ин замон аксари корҳо аллакай анҷом ёфтаанд.

Дар қисматҳои гуногуни боғ, дар майдони 1,05 гектар беш аз 5 ҳазор ниҳоли садбарги голландӣ, 500 гули мавсимӣ, 500 буттаи савсани ҳиндӣ, 800 ниҳоли дарахти ҳамешасабз ва 200 сафедор шинонда шудаанд.

Барои обёрии боғ як обанбор бо ҳаҷми 80 метри мукааб  таъмиру омода  гардида, дар қисми ғарбии он ҳавз бунёд ёфтааст.

Дар боғ муҷассамаи шоири тоҷик Абуабдуллоҳи Рӯдакӣ қомат афрохта, атрофи он сабзазор  карда шудааст.

Моҳи марти соли 2020 барқарорсозии фаввораҳои он бо чароғҳои рангоранг ва насби 9 аттраксион пурра ба анҷом расид.

Дар айни замон дар боғ 25 курсӣ ва 9 муҷассамаи хурди меъморӣ насб шудаанд.

Дар қисми шарқии боғ гулгашти қаҳрамонҳои миллии Ҷумҳурии Тоҷикистон воқеъ буда, дар он ҷо расмҳои онҳо гузошта шудаанд.

Корҳои сохтмонӣ аз тарафи ҶДММ «Паймонаи Заррин» маблағгузорӣ ва иҷро шудаанд.