Дар се участкаи интихоботии Хоруғ то соати 11:00 зиёда аз 50 фоизи интихобкунандагон раъй доданд

Октябрь 11, 2020 11:34

ДУШАНБЕ, 11.10.2020 /АМИТ«Ховар»/. Овоздиҳӣ дар участкаи интихоботии №11, воқеъ дар бинои муассисаи таълимии рақами №2 шаҳри Хоруғ аз соати шаши субҳ  оғоз ёфт. Аъзои комиссияи участкаи интихоботӣ тамоми кӯшиши худро ба он равона намуданд, ки барои овоздиҳандагон, мушоҳидон, нозирони байналмилалӣ, намояндагони ҳизбҳои сиёсӣ  шароити мусоид фароҳам оранд. Раъйдиҳандагон бо риояи фосилаи иҷтимоӣ ба ҳуҷраи овоздиҳӣ ворид мешаванд. Дар даромадгоҳи участкаи интихоботӣ табибон ҳарорати бадани ҳар  овоздиҳидандаро санҷида, дастонашро бо маҳлули антисептикӣ безараргар мегардонданд. Чунин гузориш медиҳад хабарнигори минтақавии АМИТ «Ховар» Файз Мирасан аз ҷараёни маъракаи интихоботӣ дар Вилояти Мухтори Кӯҳистони Бадахшон.

Ба иттилои мавсуф, дар ин  участкаи  интихоботӣ  1686 нафар интихобкунандагон ба қайд гирифта шудаанд, ки 14  нафари онҳо бори аввал дар чунин маъракаи муҳими сиёсӣ ширкат меварзанд. Яке аз онҳо Дилноза Ризвоншоева аст, ки соли равон ҳамин таълимгоҳро хатм намуда, ҳоло дар омӯзишгоҳи тиббии шаҳри Хоруғ таҳсил мекунад. Дилноза аз он ифтихор дорад, ки дар баробари дигар ҷавонон бори аввал ба хотири рушди бештари Тоҷикистон овоз медиҳад.

Собиқадори меҳнат Элчизан Бекикова ҳарчанд борҳо дар интихоботи гуногуни мамлакат ширкат варзидааст, аммо имрӯз  боз ҳам дар ҳаяҷон аст. Зеро ба гуфтаи вай, «иштирок дар интихобот  масъулияти бузург аст ва мо дар ин рӯз тақдири 7 соли ояндаро муайян мекунем. Роҳеро интихоб мекунем, ки моро ба мақсудамон бирасонад ва насли оянда аз интихоб ва мавқеи мо изҳори ризоятмандӣ кунад».

Дар участкаи интихоботии №12, ки дар бинои муассисаи таҳсилоти миёнаи умумии рақами №1 шаҳри Хоруғ ҷойгир аст, овоздиҳӣ муташаккилона шурӯъ шуд. Дар ин участкаи интихоботӣ 1880 нафар интихобкунанда ба қайд гирифта шудаанд, ки 12 нафарашон бори аввал раъй медиҳанд. Заррина Паллаева яке аз он нафаронест, ки дар интихоботи Президенти Ҷумҳурии Тоҷикистон ширкат мекунад. Ҳайати комиссияи участкаи интихоботӣ Зарринаро бо ин рӯзи фаромӯшнашаванда табрик намуда, ба вай туҳфаи хотиравӣ тақдим карданд. Солҳо мегузаранд, шояд минбаъд низ Заррина дар маъракаҳои дигари сиёсӣ ширкат хоҳад кард, аммо ин рӯз аз хотираш зудуда намегардад.

Собиқадори меҳнат Назарсултон Шакармамадова бо хоҳиши худ  ба участкаи интихоботӣ ҳозир шуд. Гуфт, ки ҳарчанд каме худро нороҳат ҳис мекунад, аммо зарур шумурд, ки дар чунин маъракаи муҳими сиёсӣ шахсан ширкат кунад.

Участкаи интихоботии №13, воқеъ дар маҳаллаи Теми шаҳри Хоруғ дар бинои муассисаи таҳсилоти миёнаи умумии рақами №11 ҷойгир аст. Як тан узви участкаи интихоботӣ Гавҳарниссо Бодурова гуфт, ки  “дар участкаи онҳо 630 нафар овоздиҳандагон сабти ном шудаанд, ки 6 нафарашон бори аввал дар чунин маъракаи интихоботӣ ширкат меварзанд. Ба сабаби беморию барҷомондагӣ 17 нафар ба участкаи интихоботӣ омада наметавонанд ва аз ин рӯ ба назди онҳо қуттиҳои сайёр фиристода мешаванд. Мо кӯшиш мекунем, ки маъракаи овоздиҳӣ дар сатҳи баланд доир гардад”.

Аз комиссияи ҳавзаи интихоботии Хоруғ,№18 иттилоъ доданд, ки  дар ҳар се участкаи интихоботӣ то соати 11.00 зиёда аз 50% овоздиҳандагон дар раъйдиҳӣ ширкат намудаанд. Ба қавли мушоҳидону нозирон ва намояндагони ҳизбҳои сиёсӣ, то ҳоло ягон камбудӣ ба қайд гирифта нашуда ва овоздиҳӣ мутобиқи меъёру талаботи Комиссияи марказии интихобот ва раъйдиҳии ҷумҳурӣ баргузор гардида истодааст.

Октябрь 11, 2020 11:34

Хабарҳои дигари ин бахш

Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»
Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
ИМРӮЗ-РӮЗИ БАЙНАЛМИЛАЛИИ ҲИФЗИ ПИРЯХҲО. Ҳифзи пиряхҳо аз обшавии босуръат ҳамкории дастҷамъонаи давлатҳо ва созмонҳои байналмилалиро тақозо менамояд
Пешвои миллат: «Тоҷикистони маҳбуби мо воқеан Ватани аслии Наврӯз аст»
Бузургии Зан-Модар- ин олиҳаи ҳаёт ҳамеша вирди забони башарият аст
Рӯзи Модар рамзи эҳтиром ва қадршиносии махсуси давлату ҳукумати Тоҷикистон нисбат ба Зан-Модар мебошад