Кишоварзони ноҳияи Ҳамадонӣ нақшаи ҷамъоварии пахтаро беш аз 100 фоиз иҷро намуданд

ДУШАНБЕ, 31.10.2020 /АМИТ «Ховар»/. Кишоварзони ноҳияи Мир Сайид Алии Ҳамадонии вилояти Хатлон то 30 октябр 13158,8 тонна пахта ҷамъоварӣ намуданд, ки ин баробари 100,01 фоизи иҷрои дурнамои тасдиқгардида мебошад. Ҳосилнокӣ аз ҳар гектар 22,4 сентнериро ташкил медиҳад.

Дар ин бора хабарнигори АМИТ «Ховар» бо истинод ба мақомоти иҷроияи ҳокимияти давлатии ноҳияи Мир Сайид Алии Ҳамадонӣ хабар медиҳад.

Имсол хоҷагиҳои ноҳияи Ҳамадонӣ дар майдони 5874 гектар кишти пахта гузарониданд. Аз майдони умумии кишти ин навъи зироат тибқи дурнамо мебоист 13 158 тонна пахта истеҳсол карда мешуд. Иҷрои нақшаро ҷамоатҳои деҳоти Қаҳрамон 100,09 фоиз, Меҳнатобод 100,16 фоиз, Даштигуло 100.25 фоиз, Панҷрӯд 100.01 фоиз, Чубек 100.17 фоиз ва Панҷоб 100.02 таъмин намуданд.

Дар ин шабу рӯз кишоварзон бо истифода аз обу ҳавои мусоид барои пурра ҷамъоварӣ намудани пахтаи боқимонда ва супоридани он ба корхонаҳо тамоми имконоти мавҷударо истифода менамоянд.