Пешвои миллат Эмомалӣ Раҳмон гулгашт ва муҷассамаи Шоҳ Исмоили Сомониро дар ноҳияи Рӯдакӣ ифтитоҳ намуданд

ДУШАНБЕ, 01.10.2020 /АМИТ «Ховар»/. 1 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар ноҳияи Рӯдакӣ гулгашти Исмоили Сомониро мавриди истифода қарор доданд.

Сарвари давлат дар ҳамин ҷо аз болои муҷассамаи аввалин бунёдгузори давлати тоҷикон — Шоҳ Исмоили Сомонӣ парда бардоштанд.

Муҷассама дар кӯчаи Исмоили Сомонии шаҳраки Сомониён қомат афрохта, дар идомаи тадбирҳои созандагӣ барои истиқбол аз 30-солагии Истиқлоли давлатии Ҷумҳурии Тоҷикистон аз ҷониби ҳайкалтарош Алиҷон Бобошарифов бо санъати баланд омода гардидааст.

Баландии муҷассамаи Шоҳ Исмоили Сомонӣ дар ноҳияи Рӯдакӣ 5,3 метр ва дар маҷмӯъ бо таҳкурсиаш 9,3 метрро ташкил медиҳад.

Дар ду паҳлӯи муҷассама ду шер ҳамчун рамзи ҷасорату тавонмандии миллати тоҷик гузошта шудаанд.

Масоҳати умумии замини гулгашти Исмоили Сомонӣ 0,18 гектарро дар бар гирифта, корҳои сохтмонию паймонкорӣ дар иншоотро кормандони Ҷамъияти дорои масъулияти маҳдуди “Планета БАФ” ба анҷом расондаанд.

Зимни корҳои сохтмонӣ зиёда аз 30 нафар мутахассисон ҷалб гардида, бо ҷойи кор ва маоши хуб таъмин буданд.

Гулгашти Исмоили Сомонӣ дар идомаи тадбирҳои созандагӣ зебо карда шуда, қариб 8000 бех гулҳои рангоранг ва ниҳолҳо дар он шинонида шудаанд.

Барои таъмини истироҳату фароғати сокинону меҳмонон дар атрофи муҷассама ду фаввора ва 15 адад нишастгоҳ низ гузошта шудаанд.

Ҳамзамон роҳравҳои атрофи иншоот дар масоҳати 1400 метри мураббаъ сафолакпӯш гардидаанд.

Тавре иттилоъ дода шуд, бо мақсади бо дастовардҳои арзанда истиқбол намудани 30-солагии Истиқлоли давлатии Ҷумҳурии Тоҷикистон дар асоси нақша дар ноҳияи Рӯдакӣ бунёду ба истифода додани 414 адад иншооти дорои таъйиноти гуногун дар назар аст.

Дар шаҳраки Сомониён ба ифтихори ин ҷашни фархундаи миллӣ  бунёд ва ба истифода додани 44 иншоот дар назар дошта шуда, аллакай 35 адади он мавриди баҳрабардорӣ қарор гирифтаанд.

Сарвари давлат муҳтарам Эмомалӣ Раҳмон ба сифати корҳои анҷомёфта дар гулгашти Исмоили Сомонӣ баҳои баланд дода, ба масъулон ҷиҳати истифодаи пурсамари имконоту иқтидорҳои мавҷуда барои бо сифати баланд ба анҷом расондани корҳои бунёдиву сохтмонӣ дар иншооти ҷашнии боқимонда ва дар муҳлати муайянгардида мавриди баҳрабардорӣ қарор додани онҳо дастуру ҳидоятҳои мушаххас доданд.

Атрофи гулгашти Исмоили Сомониро шабонгоҳ чароғҳои гуногуногуни равшанидиҳанда зиннат мебахшанд.