Субҳи имрӯз гурӯҳи мушоҳидони байналмилалӣ вориди Тоҷикистон шуданд

ДУШАНБЕ, 07.10.2020 /АМИТ «Ховар»/. Субҳи имрӯз гурӯҳи мушоҳидони байналмилалӣ, ки раванди интихоботи Президенти Ҷумҳурии Тоҷикистонро мушоҳида мекунанд, тариқи гузаргоҳи марзии «Гулистон»-и шаҳри Исфара вориди Тоҷикистон шуданд.

Тавре аз хадамоти матбуоти Раиси вилояти Суғд ба АМИТ «Ховар» иттилоъ доданд, дар даромадгоҳи шаҳри Исфара меҳмононро муовини Раиси вилояти Суғд Баҳоваддин Баҳодурзода ва раиси шаҳри Исфара Акрам Сулаймонзода бо самимияти хосса истиқбол гирифтанд.

Ба иттилои Комиссияи марказии интихобот ва раъйпурсии Ҷумҳурии Тоҷикистон, то имрӯз дар Тоҷикистон 258 нафар намояндагони ВАО ва 122 нафар мушоҳидони байналмилалӣ аз ИДМ, Созмони ҳамкории Шанхай, Созмони амният ва ҳамкорӣ дар Аврупо (САҲА) ,  Россия, Беларус ва якчанд сафоратхонахои муқими Душанбе номнавис (аккредитатсия) шуда, ба қайд гирифтани намояндагони дигар ташкилоти минтақавию байналмилалӣ ва кишварҳои хориҷӣ идома дорад.

Ёдовар мешавем, ки 11 октябри соли равон интихоботи Президенти Ҷумҳурии Тоҷикистон баргузор мегардад, ки дар он 5 номзад аз ҳизбҳои сиёсӣ  иштирок менамоянд. Барои назорати раванди интихобот нозирони созмону ташкилоти байналмилалӣ даъват шудаанд.