Департаменти давлатии Амрико аз осоиштагии интихоботи Тоҷикистон изҳори хушҳолӣ кард

ДУШАНБЕ, 15.10.2020. /АМИТ «Ховар»/. Департаменти давлатии ИМА дар сафҳаи твитерии Бюрои умури Осиёи Ҷанубӣ ва Миёна навишт: «Аз дидани он хушҳолем, ки интихоботи Президентии Тоҷикистон дар давраи пандемияи пуразоби ҷаҳонӣ орому осуда ва ботартиб гузашт. Аммо ҳамоно ислоҳоти муҳиме бояд амалӣ карда шавад, ки аз ҷониби САҲА/ODIHR барои кафолати шароити зарурии интихоботи демократӣ тавсия шудааст». Дар ин бора АМИТ «Ховар» бо истинод ба радиои «Озодӣ» хабар медиҳад.

Бо эълони пирӯзии Эмомалӣ Раҳмон дар интихоботи президентии 11-уми октябр раҳбарони Русияву Чин ва Белорусу Қазоқистону Узбекистон, Эрон ва давлатҳои араб ӯро табрик карданд.

Дафтари Ниҳодҳои Демократӣ ва Ҳуқуқи Инсон (ODIHR), як ниҳоди вобаста ба Созмони Амният ва Ҳамкорӣ дар Аврупо, гуфт, арзёбии ниҳоии коршиносон бо шумули машваратҳо ҷиҳати ислоҳи раванди интихобот тақрибан пас аз 8 ҳафта нашр хоҳанд шуд. Ин коршиносон бештар рӯйи ташкил ва ё мудирияти маъракаи интихобот, сармоягузории маъракаи таблиғотӣ ва шеваи бозтоби интихобот дар расонаҳо тамаркуз хоҳанд кард.

Дар ин интихобот панҷ номзад ширкат варзиданд ва эълон шуд, ки дар муқобили номзадҳои начандон номдор ба Эмомалӣ Раҳмон 90,92 дарсад ( 3 миллиону 837 ҳазор) нафар раъй додаанд.