Ҳамкории Тоҷикистону Германия дар соҳаи тандурустӣ густариш меёбад

ДУШАНБЕ, 12.12.2020 / АМИТ «Ховар»/. Дар доираи машваратҳои байниҳукуматии Ҷумҳурии Тоҷикистон ва Ҷумҳурии Федеративии Германия оид ба ҳамкории  молиявию техникӣ  бо иштироки муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ва намояндагони ҳайати Ҷумҳурии Федеративии Германия видеоконфронс доир гардид.

Тавре  аз Вазорати тандурустӣ ва ҳифзи иҷтимоии аҳолии мамлакат ба АМИТ “Ховар” хабар додан, зимн вилеоконфронс Ғафур Муҳсинзода вазъи ҳамкории  ҷумҳуриро  бо Германия  мусбат арзёбӣ  намуда, зикр  намуд, ки ин ҳамкорӣ  асосан ба масъалаҳои дастрасии ҳамаи табақаҳои аҳолӣ, хусусан хизматрасонии тиббӣ дар деҳот, соҳаи модару кудак, танзими оила, таъмини бехатарии хӯрокӣ, пешгирӣ ва мубориза бо бемории сил нигаронида шудааст.

Ҷонибҳо бори дигар тасдиқ карданд, ки ҳамкории соҳаи тандурустии Тоҷикистону Германия барои расонидани хадамоти босифати тандурустӣ дар доираи SDG 3 бо мақсади беҳтар намудани саломатии аҳолии Тоҷикистон равона карда шудааст. Тибқи  он бояд ба беҳтар шудани дастрасии ҳамаи гурӯҳҳои аҳолӣ, алахусус дар деҳот ба хидматҳои асосии тиббӣ, ки ба стандартҳои байналмилалӣ мувофиқат мекунанд ва ба таври устувор маблағгузорӣ мешаванд, кӯмак кунад.

Инчунин, дар рафти ҷаласаи онлайнӣ ҷонибҳо оид ба тавсеа бахшидани ҳамкорӣ  дар самти мубориза бар зидди бемории сил, хизматрасонии босифати тиббӣ ба модар ва кӯдак, таъмини амнияти озуқавории модарон ва кӯдакон ва дигар масъалаҳо мубодилаи афкор намуданд.

Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тибқи тартиби муқарраршуда барои иҷрои Протоколи машваратҳои байниҳукуматии Ҷумҳурии Тоҷикистон ва Ҷумҳурии Федеративии Германия оид ба ҳамкории  молиявию техникӣ тадбирҳои  зарурӣ  меандешад.