Дар Душанбе навбатдории шабонаи роҳбарияти Мақомоти иҷроияи ҳокимияти давлатии шаҳр ва ноҳияҳои он ба роҳ монда шуд

 ДУШАНБЕ, 01.12.2020. /АМИТ «Ховар»/. Бо мақсади таъмини фаъолияти мунтазами соҳаҳои ҳаётан муҳими хоҷагидорӣ дар пойтахт, мусоидат ба  ҳалли саривақтии муроҷиатҳо  ва мушкилоти шаҳрвандон дар давраи зимистони  солҳои 2020-2021 навбатдории шабонаи роҳбарияти  Мақомоти  иҷроияи ҳокимияти  давлатии шаҳри  Душанбе ва ноҳияҳои он ба роҳ монда шуд. Ҷадвали  навбатдории шабонаи роҳбарияти  мақомоти  иҷроияи ҳокимияти  давлатии шаҳри Душанбе ва ноҳияҳои он бо қарори Раиси шаҳри Душанбе Рустами Эмомалӣ аз 30 ноябри соли 2020 тасдиқ гардид.

Тавре ба АМИТ «Ховар» аз Раёсати иттилоот ва робитаҳои хориҷии дастгоҳи Раиси шаҳри Душанбе хабар доданд, тибқи қарори мазкур директори Ҷамъияти саҳомии кушодаи «Шабакаҳои барқи шаҳри Душанбе», Муассисаи давлатии «Шабакаи гармидиҳандаи шаҳри Душанбе», Корхонаи воҳиди давлатии «Обу корези шаҳри Душанбе», Ситод оид ба ҳолатҳои фавқулода ва мудофиаи гражданӣ дар шаҳри Душанбе ва дигар сохторҳои дахлдори шаҳрӣ муваззаф шудаанд ҷиҳати ташкили навбатдории шабона аз ҳисоби кормандон тадбирҳо андешида, вобаста ба хизматрасониҳои коммуналӣ, таъмин намудан бо об, энергияи  барқу гармидиҳӣ ва дигар ҳолатҳои фавқулода  чораҳои зарурӣ роҳандозӣ намоянд.