Дар ноҳияи Шоҳмансури пойтахт бо мақсади огоҳ намудани шаҳрвандон аз мавҷи дуюми бемории COVID-19 ва чораҳои пешгирӣ аз паҳншавии он ҳамоиш доир шуд

Декабрь 1, 2020 17:08

ДУШАНБЕ, 02.12.2020 /АМИТ «Ховар»/. Бо ташаббуси Мақомоти иҷроияи ҳокимияти давлатии шаҳри Душанбе имрӯз дар ноҳияи Шоҳмансури пойтахт  оид ба пешгирӣ ва паҳншавии бемории COVID-19 ҳамоиш доир шуд. Дар он муовинони Раиси шаҳри Душанбе Мавсума Муинӣ, Умед Гуреззода, директори Маркази санитариву эпидемиологии шаҳри Душанбе Абдухолиқ Амирзода, намояндаи раёсати Вазорати корҳои дохилӣ ва  роҳбарони бозорҳои шаҳри Душанбе иштирок намуданд.

Мавсума Муинӣ иброз дошт, ки мақсад аз ҳамоиши имрӯза огоҳ намудани шаҳрвандон аз мавҷи дуюми бемории COVID-19 ва чораҳои пешгирӣ аз паҳншавии он мебошад.

Муовини Раиси шаҳри Душанбе Мавсума Муинӣ ҳамчунин зикр дошт, ки “имрӯзҳо ҳарчанд сатҳи гирифторӣ ба бемории COVID-19 дар ҷумҳурӣ, алалхусус дар  шаҳри Душанбе коҳиш ёфтааст, вале мо бояд фориғбол нагардем, балки қоидаҳо ва тавсияҳои Ситоди ҷумҳуриявиро пурра иҷро намоем”.

Директори Маркази санитариву эпидемиологии шаҳри Душанбе Абдухолиқ Амирзода гуфт, ки “имрӯз дар даромадгоҳҳои бозорҳо маводи антисептикӣ ва ниқобҳои тиббӣ гузошта шуда, масъулин зимни бе ниқоб ворид шудан ба бозор барои даромадан иҷозат намедиҳанд. Вақте дохили бозор мешавем, маьлум мешавад, ки дар дохил аксари мардум бе ниқобҳои тиббӣ ҳастанд. Мо набояд ниқобҳоро ба хотири намоиш истифода кунем. Ҳоло тибқи ташхисҳо ҳолатҳое вомехӯранд, ки ягон нишонаи беморӣ дар баьзе аз сокинон ба чашм намерасад ва онҳо аз саломатии худ низ ягон шикоят надоранд. Вале онҳо гирифтори COVID- 19 ҳастанду дар онҳо ягон аломат ба чашм намерасад. Ин нафарон метавонанд 5- 10 нафари дигарро сироят кунанд. Аз ин рӯ хуб мешуд ҳамаи мо барои пешгирӣ аз ин бемории сироятӣ аз ниқобҳои тиббӣ истифода намоем”.

Дар ҳамоиш доир ба  роҳҳои пешгирии мавҷи дуюми коронавируси нав сухан рафта, зикр шуд, ки бо назардошти авҷи марҳилаи дуюми ин беморӣ бояд  ба корҳои пешгирикунанда вусъати бештар дода шавад. Ҷиҳати пешгирии бемории мазкур корҳои санитарӣ-эпидемикӣ бояд пурзӯр гардида, сокинон, аз ҷумла хонандагон ҳатман аз ниқоби муҳофизатӣ истифода намоянд. Зеро як омили пешгирикунандаи бемории COVID-19 риояи гигиенаи шахсӣ ва истифодаи ниқобҳои муҳофизатӣ мебошад.

Аз ин рӯ аз тамоми шаҳрвандони мамлакат хоҳиш карда шуд, ки қоидаҳои гигиенаи шахсию ҷамъиятиро ба таври ҳатмӣ риоя карда, бе ниқобҳои муҳофизатӣ аз хона набароянд, дар нақлиёт ва дигар ҷойҳои ҷамъиятӣ ҳатман аз ниқобҳои муҳофизатии тиббӣ истифода намуда, ба таври қатъӣ фосилаи байни ҳамдигарро ба андозаи аз якуним то ду метр нигоҳ доранд.

Мутаассифона, новобаста аз тадбирҳои андешидаи давлат ва Ҳукумати Тоҷикистон ва кормандони соҳаи тандурустӣ дар самти пешгирии бемории COVID-19 имрӯзҳо бархе аз шаҳрвандони мамлакат бар хилофи тавсияи мутахассисони соҳа ҷиҳати пешгирии ин беморӣ амал менамоянд. Хусусан имрӯзҳо дар ҷойҳои ҷамъиятӣ, кӯчаву хиёбонҳо, марказҳои хизматрасонӣ, дохили нақлиёти ҷамъиятӣ ва дигар ҷойҳои серодам шаҳрвандони зиёдеро вохӯрдан мумкин аст, ки ниқоби тиббӣ надоранд ва фосилаи иҷтимоиро риоя намекунанд, ки ин амали онҳо хилофи қоидаҳои пешгирии бемории коронавируси нави COVID-19 мебошад.

Декабрь 1, 2020 17:08

Хабарҳои дигари ин бахш

Дар Душанбе даври ҷумҳуриявии озмуни «Сайри гули лола» баргузор мегардад
Имрӯз дар «Кохи Суруш»- и шаҳри Душанбе Рӯзи пойтахти Ҷумҳурии Тоҷикистон таҷлил карда шуд
ДУШАНБЕ-ШАҲРИ КӮДАКОНИ ХУШБАХТ! Дар пойтахт сохтмони 56 муассисаи таҳсилоти томактабӣ идома дорад
ДУШАНБЕ-ШАҲРИ РАВАНДСОЗ. Ин равандҳо фарогири доираи васеи кишварҳо аз чор қитъаи олам- Осиё, Аврупо, Африқо ва Амрико мебошад
ТУ ШАҲРИ ГУЛБАДОМОНӢ, ДУШАНБЕ ! Ба Рӯзи пойтахти Ҷумҳурии Тоҷикистон бахшида мешавад
ПОЙТАХТ — СИМОИ МИЛЛАТУ ДАВЛАТ! Иқтибосҳо аз суханрониҳои Президенти Тоҷикистон ба муносибати Рӯзи пойтахт
Шаҳриёри шаҳри умеду орзуҳо ва идомадиҳандаи роҳи ниёгони некном
ДУШАНБЕИ ДИГАР. Бинои нави Парлумони Тоҷикистон дар пойтахти кишвар шаҳомоти хоса дорад
ДУШАНБЕ –МУАРРИФИ ТАЪРИХУ ФАРҲАНГ. Сокини пойтахт будан дар баробари ифтихор аз ҳар шахс масъулияти зиёд талаб мекунад
Бахшида ба Рӯзи пойтахти Тоҷикистон барномаҳои фарҳангӣ ва мусобиқаҳои варзишӣ доир мегарданд
Нақши пойтахт дар таҳкими давлатдории навини миллӣ муҳим арзёбӣ мегардад
Душанбе оинаи миллат ва пайвандгари таърих бо ояндаи давлат аст