Дар Шаҳристон масъалаи пешгирии талафоти неруи барқ ва мақсаднок истифода бурдани заминҳои наздиҳавлигиро баррасӣ карданд

ДУШАНБЕ, 22.12.2020. /АМИТ «Ховар»/. Сардори Хадамоти зиддиинҳисории назди Ҳукумати Ҷумҳурии Тоҷикистон Абдулмаҷид Муминзод бо мақсади ба мардум фаҳмонидани дастуру  ҳидоятҳои Пешвои миллат, Президенти  Ҷумҳурии Тоҷикистон муҳтарам Эмомалӣ Раҳмон бо  фаъолон ва сокинони  ноҳияи Шаҳристони вилояти Суғд суҳбату вохӯриҳо анҷом дод.

Тавре аз Хадамоти зиддиинҳисорӣ ба АМИТ «Ховар»  хабар доданд,  дар суҳбату вохӯриҳо бо сокинони ноҳияи Шаҳристон намояндаи Ҳукумати Ҷумҳурии Тоҷикистон Абдулмаҷид Муминзод нахуст миннатдории Сарвари давлатро ба мардуми ноҳия  ҷиҳати иштироки фаъолона дар интихоботи Президенти Ҷумҳурии Тоҷикистон, ки 11 октябри соли 2020 дар фазои сулҳу осоиштагӣ доир гардид,  расонид.

Абдулмаҷид Муминзод  муҳтавои муроҷиатномаи Ҳукумати Ҷумҳурии Тоҷикистонро  оид ба оқилона ва сарфакорона истифода намудани неруи барқ, риояи ҳатмии қоидаҳои зидди сӯхтор, худдорӣ аз истифодаи дастгоҳу таҷҳизоти серхароҷотро  тавзеҳ дода, таъкид намуд, ки дар асоси дастуру супоришҳои  Пешвои миллат масъулин бояд ҷиҳати таъмини аҳолӣ бо маводи озуқа ярмаркаҳои фурӯши маҳсулоти кишоварзӣ ва саноатӣ ташкил намоянд.

«Ҳамчунин аёдати шахсони ниёзманд, маъюбон, ятимон, расонидани кумак ба ин гурӯҳҳои ниёзманд, дастгирии оилаҳои камбизоат бояд мунтазам аз тарафи мақомоти иҷроияи ҳокимияти давлатии ноҳия, шаҳраку деҳот, дигар сохторҳои мақомоти давлатӣ ва соҳибкорон ба роҳ монда шавад»,-афзуд номбурда.

Дар вохӯриҳо оид ба масъалаҳои истифодаи мақсадноки заминҳои наздиҳавлигӣ, кишти картошка ва анҷоми тадбирҳои сабзкорию  гулшинонӣ маслиҳатҳои муфид дода шуд.

Сардори Хадамоти зиддиинҳисории назди Ҳукумати Ҷумҳурии Тоҷикистон Абдулмаҷид Муминзод ҳамчунин дар ҷараёни сафари корӣ аз сохтмони  як қатор иншооти ҷашнии ноҳияи Шаҳристон, аз ҷумла мактаби таҳсилоти миёнаи умумии № 19, ки барои 384 хонанда бунёд мешавад, инчунин пули мошингузар дидан намуда, тезонидани корҳои сохтмониро таъкид намуд.