Давлаталӣ Саид дар ноҳияи Ҷаббор Расулов бо тарзи истифодабарии замини наздиҳавлигии оилаи Маматқуловҳо шинос шуд

ДУШАНБЕ, 23.12.2020 /АМИТ «Ховар»/. 22 декабр муовини якуми Сарвазири мамлакат Давлаталӣ Саид ва Раиси вилояти Суғд Раҷаббой Аҳмадзода ба ноҳияи Ҷаббор Расулов сафар намуда, бо тарзи истифодабарии замини наздиҳавлигии сокинон  шинос шуданд. Давлаталӣ Саид ва Раҷаббой Аҳмадзода дар Ҷамоати деҳоти Деҳмойи ноҳия  нахуст Эргашбой Маматқулови 95 соларо аёдат намуда, сипас  бо тарз ва ташкили кор  дар   қитъаи замини наздиҳавлигии ин оила шинос шуданд.

Тавре аз  хадамоти матбуоти Раиси вилояти Суғд ба АМИТ «Ховар» иттилоъ доданд, оилаи Маматқуловҳо дар ҳавлии худ дар масоҳати 0,054 га замин гармхона сохта, дар он сабзавот, аз ҷумла карам, помидору бодиринг, шалғам, шибиту пиёз  ва ғайраро  парвариш мекунанд. Онҳо  аз ин  ҳисоб зиндагии худро таъмин сохта, ҳамзамон ба нигоҳубини чорво низ машғул мебошанд. Ин оила  бо истифода аз маҳсулоти бадастовардаашон аз китъаи замини наздиҳавлигӣ  барои зимистонгузаронӣ  низ  маводи ғизоии зарурӣ захира намудаанд.

Зимни боздид таъкид гардид, ки бояд ҳар як сокини ноҳия замини наздиҳавлигии худро самаранок истифода бурда, баҳри таъмини оилаи худ бо маводи ғизоӣ аз тамоми имкониятҳо истифода барад. Дар ин замина таҷрибаи сокинони Ҷамоати деҳоти Деҳмой шоистаи пайравӣ арзёбӣ карда шуд, зеро қариб ҳар як оила гармхонаҳои хурд ташкил кардаву  дар он ба меҳнати самаранок  машғул мебошанд.