Нерӯҳои амниятии Миср зимни ду амалиёт 40 террористро маҳв карданд

ДУШАНБЕ, 09.12.2020. /АМИТ «Ховар»/. Нерӯҳои амниятии Миср зимни ду амалиёти зиддитеррористӣ дар музофоти Синайи Шимолӣ 40 террористро маҳв карданд. Дар ин бора АИ «Синхуа» бо истинод ба изҳороти артиши Миср хабар медиҳад.

Дар изҳорот омадааст, ки нерӯҳои амниятӣ дар як амалиёти зиддитеррористӣ чанд паноҳгоҳи террористонро хароб карда, 25 террористро маҳв карданд. Зимни амалиёти дигар 15 нафар кушта шуд. Инчунин, шаш мошин, панҷ гузаргоҳи зеризаминӣ хароб карда шуда, 159 воситаи тарканда, 32 мотосикл, се силоҳи оташфишон ва чанд воситаи алоқаи бесим мусодира карда шуданд.

Бино ба иттилои манбаъ, дар ин ду амалиёт ду афсар ва чаҳор сарбоз кушта ё захмӣ шуданд. Замони амалиёт ифшо нашудааст.

Тайи солҳои охир дар Миср амалиётҳои ҷиддии зиддитеррористӣ гузаронида мешаванд. Соли 2020 нерӯҳои амниятии ин кишвар дар натиҷаи амалиётҳои такрорӣ садҳо террористонро маҳв кардаанд.