ЯК РӮЗИ ТАЪРИХ. Расо 10 сол пеш Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон лоиҳаи Қонун «Дар бораи масъулияти падару модар дар таълиму тарбияи фарзанд»-ро ба муҳокимаи умумихалқӣ пешниҳод намуда буданд

Декабрь 14, 2020 12:11

ДУШАНБЕ, 14.12.2020 /АМИТ «Ховар»/. Расо даҳ сол пеш, 14 декабри соли 2010 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ  Раҳмон лоиҳаи Қонун «Дар бораи масъулияти падару модар дар таълиму тарбияи фарзанд» -ро ба муҳокимаи умумихалқӣ пешниҳод карда буданд.

«Дар давраи ҷаҳонишавии босуръати мушкилоти башарият ва омезиши арзишҳо, вақте ки нақш ва таъсири таълиму тарбия ҳамчун маҳаки иҷтимоии рушди инсон ва таҳкими сармояи зеҳнӣ пояҳои ҷомеаи навро фароҳам месозад, қабули чунин санади муҳим иқдоми саривақтист», — изҳор дошта буданд муҳтарам Эмомалӣ Раҳмон зимни мулоқот бо аҳли ҷомеаи ҷумҳурӣ оид ба муҳокимаи лоиҳаи қонун 14 декабри соли 2010.

Ба гуфтаи Пешвои миллат, лоиҳаи қонун ба баланд бардоштани масъулияти волидон дар  таълиму тарбияи фарзандон  ва ба ҳаёти   мустаҳқилона   омода кардани онҳо  нигаронида шудааст.

Сарвари давлат хабар доданд, ки лоиҳаи қонуни мазкур ба муҳокимаи умумихалқӣ пешниҳод карда мешавад ва аз ҷомеаи ҷумҳурӣ даъват намуданд, ки давоми дуюним моҳ пешниҳодҳои худро  оид ба мукамал  гардонидани  лоиҳа пешниҳод кунанд.

Сарвари давлат таъкид карданд, ки таълим ва тарбия дар ҷараёни ҳамкории зичи се шохаи иҷтимоӣ: оила, мактаб ва ҷомеа сурат хоҳад гирифт.

“Баъзе волидон тарбияи фарзандро масъулияти мактаб мешуморанд ва ба ин мушкилот назари хеле сатҳӣ доранд. Аксари онҳо тасаввурот надоранд, ки фарзандонашон дар мактаб чӣ кор мекунанд ва вақти холии худро чӣ гуна мегузаронанд», — зикр  намуданд Президент.

Сарвари давлат таваҷҷуҳро ба зарурати таъмини муттасилии анъанаҳои беҳтарини ахлоқӣ ва одоби ҳамида,  ки аз насл ба насл интиқол меёбанд, ҷалб карданд.

Дар ҷаласа дастурҳои Сарвари давлат дар бораи зарурати эҳёи анъанаҳои таълим, тарбия ва ҷалби наврасон ба меҳнат дар маҳфилҳои мактабӣ ва ё намудҳои варзиш таъкид карда шуд. «Мактабҳои мамлакати мо тамоми имконотро мусоид месозанд, то ин ки кӯдакон дар шароити муосир таҳсил намоянд, малакаҳоеро, ки бидуни онҳо рушди иқтисодиёти мамлакатро тасаввур кардан ва сатҳи зиндагии аҳолиро таъмин намудан ғайриимкон аст, фаро бигиранд. Синфхонаҳое ҳастанд, ки бо воситаҳои техникии навтарин муҷаҳҳаз мебошанд. Аксар вақт, ҳатто дар ноҳияҳои дурдасттарини ҷумҳуриамон дар синфхонаҳо компютерҳоро дидан мумкин аст», — иброз намуданд зимни суханронӣ Сарвари давлат.

«Танҳо ҷавонони соҳибмаълумот ва соҳибихтисоси дорои малака ва касбҳои муосир метавонанд саҳми худро дар рушди давлат бигузоранд», — иброз намуданд Пешвои миллат.

Ёдовар мешавем, ки ташаббускори таҳияи ин қонун, ки моҳи августи соли 2011 тасвиб шуд, Президенти мамлакат, Пешвои миллат муҳтарам Эмомалӣ Раҳмон мебошанд.

                                    АКС аз бойгонии АМИТ «Ховар»

Декабрь 14, 2020 12:11

Хабарҳои дигари ин бахш

Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»
Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
ИМРӮЗ-РӮЗИ БАЙНАЛМИЛАЛИИ ҲИФЗИ ПИРЯХҲО. Ҳифзи пиряхҳо аз обшавии босуръат ҳамкории дастҷамъонаи давлатҳо ва созмонҳои байналмилалиро тақозо менамояд
Пешвои миллат: «Тоҷикистони маҳбуби мо воқеан Ватани аслии Наврӯз аст»
Бузургии Зан-Модар- ин олиҳаи ҳаёт ҳамеша вирди забони башарият аст
Рӯзи Модар рамзи эҳтиром ва қадршиносии махсуси давлату ҳукумати Тоҷикистон нисбат ба Зан-Модар мебошад