Ҷайҳун: Таҷрибаю кордонии деҳқони асил Назаралӣ Абдурасулов намунаи ибрат аст

ДУШАНБЕ, 30.01.2021. /АМИТ «Ховар»/. Сокини  ноҳияи Ҷайҳуни вилояти Хатлон,  собиқадорони меҳнат Назаралӣ Абдурасулови 68-сола  18 сотих замини наздиҳавлигиашро  ҳамроҳи фарзандон пурсамар истифода намуда, ҳар сол  аз он то се ҳосил мерӯёнад. Ин деҳқони асил  ҳамчунин  гармхонаи  лимӯпарварӣ ташкил намуда,  даромади  аз он ба даст овардаашро  сарфи корҳои ободонӣ ва бунёди  боғ менамояд. Номбурда собиқаи беш аз 40-солаи кор дар арсаи иқтисоду кишоварзӣ ва хизмати давлатӣ дошта, бо меҳнати содиқонааш бар нафъи ҷомеа соҳиби обрӯву эҳтиром гардидааст.

Тавре аз мақомоти иҷроияи ҳокимияти давлатии вилояти Хатлон ба АМИТ “Ховар” хабар доданд, 30 январ дар доираи сафари кории худ ба ноҳияи Ҷайҳун Раиси вилоят  Қурбон Ҳакимзода собиқадорони меҳнат Назаралӣ Абдурасуловро аёдат намуд. Раиси вилоят аз замини наздиҳавлигии Н.Абдурасулов дидан карда, барои истифодаи самарабахши он баҳои баланд дод. Қурбон Ҳакимзода фаъолияти бисёрсолаю бенуқсони ин деҳқони асил ва  дастовардҳояшро  дар соҳаи кишоварзию  боғдорӣ ёдовар шуда, онро намунаи ибрати мутахассисони ҷавон арзёбӣ кард.

“Таҷрибаю кордонии ин деҳқони меҳнатдӯст бояд  дар пешбурди корҳои кишоварзӣ  фаровон истифода карда шавад. Навкорон бояд аз ӯ тарзи истифодаи замин, умуман кори деҳқониро биомӯзанд”,-афзуд раиси вилоят.