Дар маркази ноҳияи Хуросон 15 нуқтаи фурӯши ангишт ба сокинон хизмат мерасонанд

 ХУРОСОН, 28.01.2021. /АМИТ «Ховар»/.  Дар ин рӯзҳо бо ташаббуси соҳибкорони маҳаллӣ дар ҳудуди ноҳияи Хуросони вилояти Хатлон 15 нуқтаи фурӯши ангишт ва 10 нуқтаи фурӯши сӯзишворӣ фаъолият доранд, ки шаҳрвандони ноҳия бе мушкилӣ ва бо нархҳои дастрас аз онҳо ангишти кони Айнӣ ва Зиддӣ мехаранд. Дар ин бора мутахассиси бахши иқтисод ва савдои Мақомоти иҷроияи ҳокимияти давлатии ноҳияи Хуросон  Шариф Абдуҷабборзода  ба хабарнигори АМИТ «Ховар» хабар дод.  

Ҷиҳати босарфа ва самаранок истифода бурдани қувваи барқ дар ҳамаи ҷамоатҳои шаҳраку деҳоти ноҳияи Хуросон аз ҳисоби кормандони мақомоти ҳифзи ҳуқуқ, шабакаҳои барқ, фаъолону раисони маҳаллаҳо корҳои фаҳмондадиҳӣ гузаронида шуда истодаанд. Ин корҳои тарғиботиро мардуми ноҳия хуб пазируфта, барои истифодаи сарфакоронаи қувваи барқ ҳамаҷониба кӯшиш доранд.

Маъюби гурӯҳи дуюм София Акбашова ҳамроҳи духтараш дар маркази ноҳияи Хуросон ба фурӯши ангишти кони Айнӣ машғул мебошад. Мавсуф гуфт, ки “зиёда аз 15 рӯз мешавад ҳамроҳи духтарам дар хизмати халқ қарор дорем. Ҳар халтаи ангиштро  бо нархи яклухти  26 сомонӣ  харида,  ба мардуми ноҳия бо  қимати  27 сомонӣ пешниҳод намудаем, ки як халтаи  он  зиёда аз 30 кг вазн дорад”.

София Акбашова  мегӯяд, ки сокинони ноҳия имсол ба хотири сарфакорона истифода бурдани қувваи барқ бештар ангишт мехаранд. Махсусан дар рӯзҳои  ҳавои сард то 250 халта ангишт ба савдо меравад.

Сокини деҳаи Хуросони Ҷамоати деҳоти Садриддин Айнии ноҳияи Хуросон  Бурӣ Ёдгоров иброз дошт, ки “аҳолии деҳот кӯшиш менамоянд дар фасли зимистон бештар сӯзишвории биологӣ истифода намоянд.  Ин  ба ҳукми анъана даромадааст, чунки аз даврони шӯравӣ сар карда,  то ба имрӯз  мардуми деҳот дар фасли тобистону тирамоҳ сӯзишворӣ, аз қабили ҳезум ва ангишт ҷамъоварӣ карда, дар фасли зимистон барои гармии хонаҳо  аз онҳо истифода мекарданд. Мо ҳоло ҳам аз печҳои аловӣ истифода менамоем, ки он имкон медиҳад қувваи барқ сарфа шавад”.