Раиси Маҷлиси намояндагон Маҳмадтоир Зокирзода бо Сафири Россия дар Тоҷикистон мулоқот намуд

Январь 13, 2021 16:44

ДУШАНБЕ, 13.01.2021 /АМИТ «Ховар»/. Масъалаҳои рушди ҳамкории байнипарлумонии Ҷумҳурии Тоҷикистон ва Федератсияи Россия имрӯз зимни мулоқоти Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода бо Сафири Фавқуллода ва Мухтори Россия дар Тоҷикистон Лякин-Фролов Игор муҳокима гардиданд.

Котиби матбуоти Маҷлиси намояндагон Муҳамадато Султонов ба АМИТ «Ховар» иттилоъ дод, ки Раиси Маҷлиси намояндагон Маҳмадтоир Зокирзода изҳор дошт, ки бо саъю кӯшишҳои ҳарду кишвар муносибатҳои дуҷониба имрӯз дар сатҳи шарикии стратегӣ қарор доранд. Ин муносибатҳо устуворона рушд мекунанд ва дурнамои равшану хуб ҳам дар пай доранд.

«Фикр мекунам, ки Шумо бо ман розӣ хоҳед шуд, ки муносибатҳои самимона, боэътимод ва дӯстонаи байни Президентҳои кишварҳоямон Эмомалӣ Раҳмон ва Владимир Путин дар рушди фаъолонаи робитаҳои дуҷониба нақши махсус доранд. Мулоқотҳо ва тамосҳои онҳо муносибатҳои дуҷонибаро бештар пешрафта ва муассиртар  мегардонанд», — илова намуд Раиси Маҷлиси намояндагони Тоҷикистон.

Зикр гардид, ки дар тӯли зиёда аз чоряк асри ҳамкориҳои нек байни Тоҷикистон ва Россия беш аз 300 созишномаи ҳамкорӣ ба имзо расидаанд, ки ба шарофати онҳо дар миёни кишварњоямон динамикаи устувори ҳамкориҳо дар соҳаҳои сиёсӣ, иқтисодӣ ва ҳарбӣ бунёд ёфтаанд.

Маҳмадтоир Зокирзода ҳамчунин афзуд, ки бо дарназардошти аҳамияти таҳкими робитаҳои дуҷониба, муайян кардани самтҳои нави умедбахши ҳамкорӣ бо Федератсияи Россия, ки шарики стратегии мо мебошад, парлумони кишвар, алахусус Маҷлиси намояндагон минбаъд низ ҷиҳати таҳкими заминаи ҳуқуқии дахлдор тадбирҳои мушаххас ва пайваста меандешад.

Тамосҳои фаъол ва кори муштараки роҳбарон ва аъзоёни парлумонҳои кишварҳои мо дар доираи Ассамблеяи байнипарлумонии кишварҳои узви ИДМ, Ассамблеяи парлумонии СААД ва дигар мақомоти байнипарлумонӣ амалӣ карда мешаванд.

Вазифаҳои муштараки мо, бешубҳа, мусоидат ба таҳким ва рушди робитаҳои тиҷоративу иқтисодӣ ва илмӣ-техникӣ, рушди робитаҳои самарабахши доираҳои тиҷоратии ду давлат тавассути ташаккули инфрасохтори  муосири муносибатҳои бозорӣ, фароҳам овардани фазои сармоягузорӣ ва ҷолибияти сармоягузорӣ, инчунин танзими равандҳои муҳоҷирати меҳнатӣ, рушди ҳамкорӣ мебошанд.

Боварӣ дорам, ки мо роҳҳои нави истифодаи пурраи иқтидори Тоҷикистону Россияро пайдо карда, онҳоро дар оянда боз ҳам тақвият хоҳем дод, — гуфт дар анҷоми мулоқот Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода.

Дар ҷараёни суҳбат инчунин дигар масъалаҳо муҳокима гардиданд.

Январь 13, 2021 16:44

Хабарҳои дигари ин бахш

Дар Душанбе дурнамо ва рушди қонунгузории шаҳрак ва деҳот дар шароити ҷаҳонишавӣ баррасӣ карда шуд
Қонуни Ҷумҳурии Тоҷикистон «Дар бораи мақоми омӯзгор» қабул карда шуд
Ҳайати вакилони Тоҷикистон дар Муколамаи дуюми минтақавии парламентӣ оид ба рушди технологияҳои «сабз» иштирок намуд
Дар Маҷлиси намояндагон лоиҳаи Қонуни Ҷумҳурии Тоҷикистон «Дар бораи мақоми омӯзгор» мавриди баррасӣ қарор гирифт
Дар Русия ҷаласаҳои навбатии Ассамблеяи байнипарламентии давлатҳои ИДМ баргузор гардиданд
Файзалӣ Идизода бо ваколатдор оид ба ҳуқуқи инсон дар Федератсияи Русия вохӯрӣ намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо муовини Раиси Ҳукумати Федератсияи Русия Марат Ҳуснуллин мулоқот намуданд
Файзалӣ Идизода дар ҷаласаи маҷозии роҳбарони парламентҳои кишварҳо иштирок намуд
Иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Ҳайати Гурӯҳи дӯстӣ ва ҳамкории Маҷлиси намояндагони Тоҷикистон бо Палатаи намояндагони Маҷлиси миллии Беларус мулоқот намуд
Намояндаи Тоҷикистон дар Конфронси умумиҷаҳонии парламентӣ оид ба мубориза бо терроризм ва пешгирии ифротгароӣ иштирок намуд
Вакили Маҷлиси намояндагон: «Парлумони Тоҷикистон иштирокчии фаъол ва шарики муътамади Форуми осиёии ҳамкории парламентӣ мебошад»