Тоҷикистон аз ба имзо расидани Баёнияи нишасти 41-уми Шӯрои ҳамкории кишварҳои арабии Халиҷ истиқбол мекунад

ДУШАНБЕ, 08.01.2021 /АМИТ «Ховар»/. 5 январ дар ал-Уло Подшоҳии Арабистони Саудӣ нишасти 41-уми Шӯрои ҳамкории кишварҳои арабии Халиҷ баргузор гардид, хабар медиҳад АМИТ «Ховар».

Дар робита ба ин, Вазорати корҳои хориҷии Ҷумҳурии Тоҷикистон изҳорот пахш намуд, ки дар он, аз ҷумла, омадааст: «Ҷумҳурии Тоҷикистон аз Баёнияи ал-Уло, ки аз сӯи Подшоҳии Арабистони Саудӣ, Амороти Муттаҳидаи Арабӣ, Давлати Кувайт, Подшоҳии Баҳрайн, Салтанати Умон, Ҷумҳурии Арабии Миср ва Давлати Қатар дар нишасти 41-уми Шӯрои ҳамкории кишварҳои арабии Халиҷ 5 январи 2021 дар ал-Уло, Подшоҳии Арабистони Саудӣ имзо шуд, истиқбол мекунад ва онро иқдоми зарурӣ дар роҳи барқарор сохтани муносибатҳо ва таҳкими амну субот ва шукуфоӣ дар минтақа мешуморад».