Ба ифтихори Рӯзи Артиши миллӣ дар Донишкадаи давлатии фарҳанг ва санъат ҳамоиш доир шуд

ДУШАНБЕ, 22.02.2021 /АМИТ «Ховар»/.  Имрӯз бахшида ба 28 — умин солгарди таъсиси Қувваҳои Мусаллаҳи Ҷумҳурии  Тоҷикистон  дар Донишкадаи давлатии фарҳанг ва санъати Тоҷикистон ба номи Мирзо Турсунзода ҳамоиши фарҳангӣ доир гардид. Дар ҳамоиши мазкур афсарону сарбозони Гвардияи миллӣ ва устодону донишҷӯёни донишкада  иштирок намуданд.

Ректори Донишкадаи давлатии фарҳанг ва санъати Тоҷикистон ба номи Мирзо Турсунзода, доктори илмҳои филологӣ Муҳриддин Низомӣ иброз намуд, ки  Қувваҳои Мусаллаҳи Ҷумҳурии Тоҷикистон, ки яке аз рукнҳои асосии давлатдории миллиамон буда, баъд аз якуним соли ба даст овардани Истиқлоли давлатӣ, яъне 18 декабри соли 1992 дар марҳалаи ниҳоят вазнин ва ҳассоси таърихӣ, дар шароите, ки бақои давлати мустақили тоҷикон таҳти хатари ҷиддӣ қарор дошт, таъсис дода шуданд.  23-юми феврали соли 1993 аввалин расми гузашти низомии афсарону сарбозон доир гардид. Бо назардошти зарурати ҳифзи сарҳадоти кишвар соли 1997-ум Кумитаи ҳифзи сарҳади давлатии назди Ҳукумати Тоҷикистон таъсис дода шуда, шурӯъ аз соли 2005 ҳифзи боэътимоди марзҳои кишвар пурра ба зиммаи Қӯшунҳои сарҳадӣ ҳамчун ҷузъи таркибии Қувваҳои Мусаллаҳи мамлакат гузашт.

Зикр гардид, ки Ҳукумати мамлакат баҳри мустаҳкам намудани қобилияти мудофиавии Артиши миллӣ, баланд бардоштани сатҳи омодабошии ҷангӣ, беҳтар гардондани шароити моддӣ – техникӣ ва беҳтар намудани вазъи иҷтимоии хизматчиёни ҳарбӣ пайваста ғамхорӣ зоҳир менамояд. Маҳз натиҷаи ҳамин ғамхориҳои рӯзафзун аст, ки имрӯз Артиши миллии мо ба неруи тавонои ҳарбӣ ва сипари боэътимоди сулҳу субот табдил ёфтааст.

«Бо назардошти он ки сафи Қувваҳои Мусаллаҳи кишварамонро асосан ҷавонон ташкил медиҳанд, тарбияи ҳарбӣ-ватандӯстӣ ва тақвияти ҳисси миллии сарбозони оянда аз вазифаҳои муҳимтарини муассисаҳои таҳсилоти миёнаи умумӣ, олии касбӣ ва аҳли ҷомеа ба ҳисоб меравад. Бо ин мақсад ҳамаҷониба омӯхтани таърихи халқи тоҷик, ифтихор аз он ва гузаштагони шарафманди хеш –қаҳрамонони миллии халқамон ва дигар фарзандони сарсупурдаи миллат бисёр муҳим мебошад», — гуфт Муҳриддин Низомӣ.