Дар корхонаҳои саноатии шаҳри Бӯстон нисбат ба соли 2020 истеҳсолот зиёд аст

ДУШАНБЕ, 15.02.2021 /АМИТ «Ховар»/. Дар корхонаҳои саноатии шаҳри Бӯстон ба маблағи 444,7 миллион сомонӣ маҳсулоти саноатӣ истеҳсол карда шуд, ки нисбат ба соли гузашта 106,3 миллион сомонӣ зиёд мебошад. Бо мақсади таъмини амнияти озуқаворӣ аз ҷониби корхонаҳои саноатӣ ва соҳибкорон орд,  равғани растанӣ ва маҳсулоти қаннодӣ  истеҳсол карда шуд. Дар ин бора имрӯз  зимни нишасти матбуотӣ раиси шаҳри Бӯстон Раъно Ҳошимзода ба рӯзноманигорон иттилоъ дод.

Тавре мудири  шуъбаи рушди иҷтимоӣ ва робита бо ҷомеаи дастгоҳи раиси шаҳри Бӯстон  Мамнур Нурзода ба хабарнигори АМИТ “Ховар” хабар дод, раиси шаҳр дар нишаст иброз дошт, ки алҳол 33 адад корхонаҳои саноатӣ дар шаҳр фаъолият дошта, дар онҳо зиёда аз 1900 нафар кормандон кор мекунанд. Дар дувоздаҳ моҳи соли сипаригардида ҳаҷми истеҳсоли маҳсулоти саноатӣ бо назардошти хизматрасониҳои пулакии барқу об ва бахши хусусӣ ба 516,8 миллион сомонӣ расид, ки нисбат ба ҳамин давраи соли гузашта  111,0 миллион сомониро ташкил дод.

Раиси шаҳр инчунин аз нақшаву тадбирҳои созандагиву бунёдкорӣ ба истиқболи сазовори ҷашни фархундаи миллиамон-30-солагии Истиқлоли давлатии Ҷумҳурии Тоҷикистон ёдовар гардида, иброз дошт, ки дар шаҳри Бӯстон баҳри татбиқи Фармони Президенти Ҷумҳурии Тоҷикистон “Дар бораи 30-солагии Истиқлоли давлатии Ҷумҳурии Тоҷикистон”, қарори раиси шаҳри Бӯстон ба имзо расида, бо назардошти тағйиру иловаҳо нақшаи корҳои ободониву созандагӣ ба 180 адад расонида шуд, ки он фарогири корҳои ободониву бунёдкорӣ, созандагӣ ва таъмиру барқарорсозии муассисаҳои гуногун, бунёди майдончаҳои варзишӣ, биноҳои истиқоматӣ ва амсоли инҳо мебошад.