Дар шаҳрҳои Хуҷанд, Гулистон ва ноҳияи Б.Ғафуров амалиёти «Тозагии маҳал» гузаронида шуд

ДУШАНБЕ, 03.02.2021. /АМИТ «Ховар»/.  Бо мақсади беҳтар намудани вазъи экологӣ, тозаву обод намудани муҳити атроф ва инчунин сазовор пешвоз гирифтани ҷашни муқаддаси миллӣ- 30-солагии Истиқлоли давлатӣ дар шаҳру ноҳияҳои вилояти Суғд амалиёти «Тозагии маҳал» ҷараён дорад.

Тавре хабарнигори минтақавии АМИТ «Ховар» Абдуаҳад Дадобоев бо истинод ба маълумоти Мақомоти иҷроияи ҳокимияти давлатии вилояти Суғд иттилоъ медиҳад, амалиёти мазкур бо ибтикори Раёсати ҳифзи муҳити зисти вилоят дар ҳамкорӣ бо дигар мақомоти иҷроия рӯи кор омада, ҳадафи асосии он вусъат бахшидан ба корҳои ободониву хуррамгардонӣ дар кӯчаву хиёбонҳои шаҳру ноҳияҳо, маҳалҳои аҳолинишин, қад-қади роҳҳои мошингард, мавзеъҳои партовпартоӣ ва назди ҷӯйбору соҳили дарёҳо мебошад.

Чунин амалиёти «Тозагии маҳал» дар дар кӯчаи «60-солагии Тоҷикистон»-и маркази вилояти Суғд- шаҳри Хуҷанд баргузор гардида, дар он донишҷӯёни Литсейи касбии №56 ва хонандагони МТМУ №13, дар маҷмӯъ 350  нафар иштирок намуда, қад-қади роҳҳо ва роҳи пиёдагарди кӯчаи мазкурро аз партовҳои гуногун  тоза намуда, дар натиҷа   ба партовгоҳи шаҳр 3 м³ ахлоту хокрӯба  бароварданд.

Дар доираи амалиёти мазкур дар шаҳри Гулистон низ бо иштироки қариб 700 нафар кормандони ташкилоту муассисаҳо аз назди коргоҳи ҶСК «Қолинҳои Қайроққум» то мавзеи НБО-и «Қайроққум» 2 км ҷӯйборҳо, 840 м² ҳудуди маҳаллаҳои аҳолинишин, 3 км роҳҳои асосӣ аз партовҳои гуногун тоза карда шуда, 4 м³ партов ҷамъоварӣ гардид.

Дар ноҳияи Бобоҷон Ғафуров амалиёти мазкур дар ҳудуди ҷамоатҳои деҳоти Ёва ва Ғозиён бо иштироки аҳолии ҷамоатҳо, кормандони соҳаи тандурустӣ ва толибилмони мактабҳои №№31 ва 49 бо теъдоди умумии 250 нафар гузаронида шуда, зимни он роҳҳо аз партовҳои гуногун тоза карда шуда, ба партовгоҳи ноҳия 5 м³ ахлоту хокрӯба бароварда шуд.

Дар доираи амалиёти «Тозагии маҳал» дар дигар минтақаҳои вилоят низ  ҳашарҳои дастаҷамъонаи ободонӣ баҳри тозаву озода намудани муҳити атроф идома доранд.