Дар шоҳроҳи байналмилалии Душанбе-Турсунзода беш аз 400 бех ниҳоли арчаи можевелник шинонида шуд

ДУШАНБЕ, 08.02.2021 /АМИТ «Ховар»/. Дар маъракаи ниҳолшинонӣ, ки дар шафати шоҳроҳи байналмилалии мошингарди Душанбе-Турсунзода, воқеъ  дар Ҷамоати деҳоти Қаратоғ, Работ, Навобод, Регар  доир гардид, беш аз 400 бех ниҳоли арчаи намуди  можевелник шинонида шуд.

Хабарнигори АМИТ «Ховар», иттилоъ медиҳад, ки дар маъракаи  ниҳолнишонӣ, ки ба истиқболи сазовори ҷашни 30-солагии Истиқлоли давлатии Ҷумҳурии Тоҷикистон ва сабзу хуррам гардонидани ҷумҳурӣ доир гардид, дар радифи сокинони ҷамоатҳои деҳоти шаҳри Турсунзода, кормандони ташкилоту идораҳои воқеъ дар шафати шоҳроҳ, ҳамзамон Раиси Кумитаи ҳифзи муҳити зисти назди Ҳукумати ҷумҳурӣ Баҳодур Шерализода, Раиси шаҳри Турсунзода Парвиз Акрамзода низ иштирок намуданд.

Бояд тазаккур дод, ки бо ташаббуси Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамасола дар саросари Ҷумҳурии Тоҷикистон маъракаи ниҳолшинонӣ баргузор мегардад,  ки ба беҳтар шудани ҳолати экологӣ ва баланд бардоштани сатҳи маърифати экологию зебопарастии аҳолӣ мусоидат менамояд.

Шоҳроҳи байналмилалии Душанбе-Турсунзода яке аз роҳҳои бузурги мошингард дар ғарби Тоҷикистон маҳсуб ёфта, тавассути он ҳамлу нақли бор  ва мусофирон  аз кишварҳои ҳамҷавор сурат мегирад. Бинобар ин, тасмим гирифта шудааст, ки дар шафати ин роҳи бузурги байналмилалӣ корҳои ободонӣ, аз ҷумла шинонидани ниҳоли дарахтони ороишӣ, гулу буттаҳои гуногун, ки ба ободонӣ ва тозагии муҳити зист мусоидат менамоянд, ташкил карда шавад.

Бино ба маълумоти сардори шуъбаи ҳифзи муҳити зисти шаҳри  Турсунзода, дар ин рӯз аҳли Ҷамоати деҳоти Қаратоғ, Ҷамоати деҳоти Навобод, Ҷамоати деҳоти Регар, Ҷамоати деҳоти Работ ва кормандони ташкилоту идораҳои дар шоҳроҳ ҷойгиршуда дар маҷмӯъ 3 500 нафар дар маъракаи ниҳолшинонӣ иштирок намуданд.

Ҳамзамон дар радифи ҳашари ниҳолшинонӣ аз соҳилҳои дарёҳои Қаратоғ ва Ширкент 30 куб партовҳо ба партовгоҳи марказии шаҳр бароварда шуданд.