ДДМИТ дар оянда мутахассисони марбут ба иқтисоди рақамӣ омода менамояд

ДУШАНБЕ, 10.02.2021 /АМИТ «Ховар»/. Донишгоҳи давлатии молия ва иқтисоди Тоҷикистон тасмим гирифтааст, ки соли равон  ихтисоси нав-  иқтисоди рақамиро дар назди кафедраи моделсозии математикӣ ва иттилоотии Донишгоҳ ташкил намояд. Дар ин хусус имрӯз ба намояндагони воситаҳои ахбори омма Ректори Донишгоҳи давлатии молия ва иқтисоди Тоҷикистон Шукрулло Хайрзода иттилоъ дод.

Мавсуф зикр намуд, ки ихтисоси иқтисоди рақамӣ дар гурӯҳи ихтисосҳои Маркази миллии тестӣ ба қайд гирифта шудааст. Интизор меравад, ки  дар соли таҳсили  2021-2022  вобаста ба ин ихтисос  Донишгоҳи давлатии молия ва иқтисоди Тоҷикистон довталабонро қабул намуда, мутахассисонро дар самти иқтисоди рақамӣ тайёр намояд.

Шукрулло Хайрзода афзуд, ки  “ҳоло дар донишгоҳи мазкур 10384 нафар донишҷӯ- 6236 нафар дар шӯъбаи рӯзона ва  4148 нафар  дар шӯъбаи ғоибона ба таҳсил фаро гирифта шудаанд. 1739 нафар донишҷӯ тариқи буҷавӣ ва 8642 нафар тариқи шартномавӣ дар донишгоҳ таҳсил доранд”.

Бо дахли сатҳу сифати таълим дар Донишгоҳи давлатии молия ва иқтисоди Тоҷикистон зикр шуд, ки сатҳи донишазхудкунии донишҷӯён дар соли сипаригардида нисбат ба соли  2019-ум  3,1 фоиз беҳтар гардидааст. Донишгоҳ дорои 10 синфхонаи компютерӣ, 2 маркази интернетӣ бо 2 китобхонаи электронӣ буда, соли равон 1 синфхонаи компютерӣ бо 20 компютери замонавӣ (моноблок)  ба истифода дода шуд. Инчунин воситаҳои методию таълимии электронӣ тариқи планшетҳо ва ноутбукҳо паҳн карда шуда, қисм ба қисм ҷараёни таълим ба истифодаи пурраи чунин воситаҳо гузаронида мешавад.

Ин дар ҳолест, ки ҳоло дар Донишгоҳи давлатии  молия ва иқтисоди Тоҷикистон 2000 таҷҳизоти навъи гуногуни технологияҳои иттилоотӣ ва коммуникатсионӣ, назири 888 компютер, 124 ноутбук, 241 принтерҳои навъи гуногун, 369  UPS, 13 WiFi-роутер, 42 проектор, 23 тахтаи электронӣ, 9 планшети деворӣ, 12 экрани банерӣ, 1 адад барномаи зиддивирусии литсензионӣ барои  400  компютер, 1 баста барномаи таълимии 1С бухгалтерӣ мавҷуданд.