Вазирони саноати Тоҷикистон ва Россия дурнамои кооператсияи саноатиро дар соҳаи мошинсозӣ муҳокима карданд

ДУШАНБЕ, 11.02.2021 /АМИТ «Ховар»/. Вазири саноат ва технологияҳои нави Ҷумҳурии Тоҷикистон Шералӣ Кабир ва вазири саноат ва савдои Федератсияи Россия Денис Мантуров 8 феврал вазъи кунунии ҳамкории тиҷоратӣ ва иқтисодиро баррасӣ карданд, хабар медиҳад маркази матбуоти вазорат.

Ба мувофиқа расиданд, ки ҷиҳати густариши робитаҳои кооператсионӣ ва афзудани гардиши мутақобилаи молҳо якҷоя кӯшиш ба харҷ диҳанд.

Илова бар ин, дурнамои кооператсияи саноатиро дар соҳаи мошинсозӣ, аз ҷумла дар ҳудуди Тоҷикистон ташкил намудани истеҳсоли шинаҳоро муҳокима карданд.

Денис Мантуров дар ҷараёни мулоқот Шералӣ Кабир ва ширкатҳои тоҷикиро даъват кард, ки дар «намуди содиротӣ» -и «ИННОПРОМ»  — намоишгоҳи саноатии «Ҳафтаи калони саноатӣ», ки аввали моҳи апрел дар Тошканд баргузор мешавад, ширкат варзанд.

АКСИ: ВСТ-и РОССИЯ