Дар рӯйдодҳои зидди амният 270 нафар дар давоми як моҳ дар Афғонистон ҷони худро аз даст доданд

ДУШАНБЕ, 02.03.2021 /АМИТ «Ховар»/. Дар асоси маълумоти хабаргузории TOLOnews, моҳи феврали соли равон дар Афғонистон 270 шаҳрванд ва намояндагони мақомоти қудратӣ ва ҳифзи ҳуқуқ ҷон бохтаанд ва 173 нафари дигар маҷрӯҳ шуданд, хабар медиҳад АМИТ “Ховар” ба истинод ба ин манбаъ.

Ин одамон дар натиҷаи таркиши минаҳои магнитӣ, минаҳои канори роҳ, ҳамлаҳои ҳадафнок ва ҳуҷумҳои «Толибон» (мамнуъ дар Тоҷикистон) ба посгоҳҳо, деҳот ва шаҳрҳои Афғонистон кушта ва маҷрӯҳ шуданд.

Ин дар ҳолест, ки дар моҳи январи соли равон 271 нафар кушта ва 347 нафари дигар захмӣ шуда буданд.

Ҳамзамон бо сарнавишти номуайянии сулҳ, нигарониҳо аз бадтар шудани вазъи амният дар баҳори имсол бо гузашти ҳар рӯз бештар мешавад.

TOLOnews дар ин гузориш танҳо рӯйдодҳои аз тарафи манбаъҳои мустақил тасдиқшударо ҷой додааст.

Тавре таъкид мегардад, ҳарчанд дар ду ҳафтаи ахир хабарҳо дар бораи таркиши минаҳои магнитӣ ва кушторҳои ҳадафмандона дар кишвар камтар ба назар мерасанд, аммо гузоришҳо нишон медиҳанд, ки бо наздик шудани баҳор дар чанд вилоят даргириҳои шадид байни неруҳои давлатӣ ва «Толибон» оғоз шудаанд.