Дар Ҷамоати деҳоти Ворух курсҳои кӯтоҳмуддати омӯзишии ройгон барои бонувон ба роҳ монда шуданд

ДУШАНБЕ, 04.04.2021 /АМИТ «Ховар»/. Вазорати меҳнат, муҳоҷират ва шуғли аҳолии Ҷумҳурии Тоҷикистон барои соҳибкасб намудани занону бонувон, ҷавонону наврасон, калонсолон ва дар маҷмӯъ, аҳолии Ҷамоати деҳоти Ворухи шаҳри Исфараи вилояти Суғд курсҳои кӯтоҳмуддати омӯзишии ройгон ба роҳ монда, тасмим дорад, ки  филиали Муассисаи давлатии «Маркази омӯзишии калонсолон» таъсис диҳад.

Тавре аз маркази матбуоти Вазорати меҳнат, муҳоҷират ва шуғли аҳолии Ҷумҳурии Тоҷикистон ба АМИТ «Ховар» иттилоъ доданд, 2 апрел дар заминаи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон Вазири меҳнат, муҳоҷират ва шуғли аҳолии Ҷумҳурии Тоҷикистон Ширин Амонзода ба Ҷамоати деҳоти Ворухи шаҳри Исфараи вилояти Суғд сафари корӣ намуд.

Зимни боздид барои соҳибкасб намудани аҳолии ҷамоат ташкил намудани курсҳои кӯтоҳмуддати қаннодӣ, кафшергарӣ, дӯзандагӣ ва омӯзиши малакаҳои нави коргарӣ мавриди баррасӣ қарор гирифт.

Дар доираи сафар ҳайати гурӯҳи кории Вазорати меҳнат, муҳоҷират ва шуғли аҳолии Ҷумҳурии Тоҷикистон муовини якуми Вазири меҳнат, муҳоҷират ва шуғли аҳолӣ Абдуғаффор Раҳмонзода,  сардори Хадамоти назорати давлатӣ дар соҳаи меҳнат, муҳоҷират ва шуғли аҳолӣ Дӯстмурод Муродзода,  сардори Хадамоти муҳоҷират Тоҳир Каримзода  ва дигар масъулин иштирок намуданд.

Ҳамчунин тасмим гирифта шуд, ки дар деҳоти мазкур маркази омодагии пеш аз сафар барои муҳоҷирони меҳнатӣ ба роҳ монда шавад.

АКСҲО: Вазорати меҳнат, муҳоҷират ва шуғли аҳолии Ҷумҳурии Тоҷикистон