Дар Маҷлиси намояндагон ҷаласаи нахустини Шӯрои ҷаҳонии таҳаммулпазирии сулҳ ба таври фосилавӣ доир гардид

ДУШАНБЕ, 27.04.2021 /АМИТ «Ховар»/. Имрӯз ҷаласаи нахустини Маҷлиси намояндагони Маҷлиси Олии Ҷумҳурии Тоҷикистон ва Шӯрои ҷаҳонии таҳаммулпазирӣ ва сулҳи Амороти Муттаҳидаи Араб дар реҷаи фосилавӣ баргузор гардид.

Тавре котиби матбуоти Маҷлиси намояндагон Муҳаммадато Султонов  ба АМИТ «Ховар» хабар дод,  дар кори ҷаласаи мазкур вакилони Маҷлиси намояндагон Файзулло Баротзода, Хайриддин Усмонзода, Ғиёсиддин Шарифзода, Раънохон Бобоҷониён ва Саодатшо Матробиён иштирок намуданд.

Раиси Комиссияи одоби вакилони Маҷлиси намояндагон Файзулло Баротзода иброз намуд, ки  “мехостам дар шахсияти Шумо ва ҳамкорони гиромии аморотӣ Ҳукумат ва мардуми АМА-ро барои муваффақона амалӣ шудани “Мисбор ал-Амал”, “Стантсияи автоматии байнисайёравии Умед” табрик намоям. 9 феврали имсол зонди кайҳонии “Умед” ба мадори Миррих ворид гардид. Шуморо бо ин рӯйдоди муҳими таърихӣ табрик менамоям. АМА аввалин дар байни кишварҳои араб ва панҷумин кишвари ҷаҳон аст, ки зондро ба Миррих фиристодааст ва ба ин васила ба Клуби кишварҳои кайҳонӣ шомил гардид. Мо аз чунин дастовардҳои АМА дар соҳаи кайҳонӣ бениҳоят ифтихор ва хурсанд ҳастем”.

Файзулло Баротзода ҳамчунин таъкид намуд, ки дипломатияи парлумонӣ дар баробари дипломатияи анъанавӣ дар таҳким ва тавсеаи робитаҳои дуҷонибаи Тоҷикистон ва Амороти Муттаҳидаи Араб дар соҳаҳои мухталиф нақши муассир дорад. Роҳандозии ҳамкории байнипарлумонӣ миёни Тоҷикистон ва АМА борҳо дар вохӯриҳои сатҳи олӣ байни роҳбарони олии сиёсии Тоҷикистон ва АМА, инчунин дар сатҳи машваратҳои сиёсӣ байни вазоратҳои корҳои хориҷии Тоҷикистон ва АМА муҳокима гардида буд.

-Мо боварии комил дорем, ки ҳамкорӣ байни Маҷлиси намояндагон   ва Шӯрои ҷаҳонии таҳаммулпазирӣ ва сулҳи Амороти Муттаҳидаи Араб  ба таҳким ва рушди минбаъдаи робитаҳои дуҷониба такони ҷиддӣ хоҳад бахшид,—афзуд Файзулло Баротзода.

Дар мулоқот ҳамчунин зикр карда шуд, ки ҷонибдории ташаббусҳои байналмилалии ҳамдигар аз сатҳи баланди ҳамкории дуҷониба дар ҳошияи созмонҳои байналмилалӣ гувоҳӣ медиҳад. Ҷониби Тоҷикистон дар оянда низ барои дастгирии номзадии кишвари дӯст дар созмонҳои мантақавию байналмилалӣ омодагии худро баён менамояд.

Ҷаласаи нахустини Маҷлиси намояндагони Маҷлиси Олии Ҷумҳурии Тоҷикистон ва Шӯрои ҷаҳонии таҳаммулпазирӣ ва сулҳи Амороти Муттаҳидаи Араб дар реҷаи фосилавӣ худи ҳамин рӯз корашро ба анҷом расонид.

АКС аз Маҷлиси намояндагон