Доир ба саҳми Садриддин Айнӣ дар рушди илму фарҳанги тоҷик намоиш ва конфронси илмӣ доир шуд

Апрель 14, 2021 15:18

ДУШАНБЕ, 14.04.2021 /АМИТ «Ховар»/. Имрӯз дар Осорхонаи миллии Тоҷикистон бахшида ба ҷашни 30-солагии Истиқлоли давлатии Ҷумҳурии Тоҷикистон, Рӯзи илми тоҷик ва  143-солагии Қаҳрамони Тоҷикистон Садриддин Айнӣ таҳти унвони «Саҳми Садриддин Айнӣ дар рушди илму фарҳанги халқи тоҷик»  намоиш ва конфронси илмӣ доир гардид.

Тавре сардори шуъбаи экскурсионӣ ва оммавии
Осорхонаи миллии Тоҷикистон Фаридун Кенҷаев ба АМИТ «Ховар» иттилоъ дод, дар намоиш директори Осорхонаи миллии Тоҷикистон Аҳлиддин Ибодуллозода, намояндаи Дастгоҳи иҷроияи Президенти Ҷумҳурии Тоҷикистон Масрури Абдулло, ректори Донишгоҳи аграрии Тоҷикистон ба номи Шириншоҳ Шоҳтемур Усмон Маҳмадёрзода, ректори Донишкадаи давлатии забонҳои Тоҷикистон ба номи Сотим Улуғзода Ҷило Гулназарзода, Котиби якуми Сафорати Федератсияи Россия дар Ҷумҳурии Тоҷикистон Сергей Колотилинский, устодони Донишгоҳи миллии Тоҷикистон, набераи устод Садриддин Айнӣ- Эраҷ Айнӣ, сардори Осорхонаи адабии Садриддин Айнӣ- Шердил Каримов ва дигар олимону донишмандон ширкат намуданд.

Директори Осорхонаи миллии Тоҷикистон Аҳлиддин Ибодуллозода зимни ифтитоҳи намоиш зикр намуд, ки «пас аз Инқилоби Октябр ва пеш омадани зарурати таъсиси собиқ ҷумҳуриҳои Шӯравии Сотсиалистӣ чеҳраҳои шинохтаи ҳар халқу миллат барои муаррифии таърихи худ саъю талош намуданд. Дар ин ибтикори наҷиб аз ҷониби тоҷикон саҳми устод Садриддин Айнӣ хеле назаррас мебошад».

Дар намоиш аз фонди Осорхонаи миллии Тоҷикистон осори санъати тасвирӣ, кандакории рӯи чӯб ва нимпайкараҳое, ки аз ҷониби ҳунармандони тоҷик офарида шудаанд, ба маърази тамошо гузошта шудаанд. Ҳамчунин якчанд ашёи таърихие, ки бозгӯйи ҳаёту фаъолияти пурсамари устод Садриддин Айниянд, ба монанди қаламдон, рангдон, айнакҳо, худкор, асои мунаққаш, гулдон, курсӣ, чароғи рӯйимизӣ, офтобаи мисӣ, китобҳои дастнавис ва чопи сангӣ, шаҳодатномаи депутатӣ ва ордену медалҳо аз фонди захиравии Осорхонаи адабии Садриддин Айнӣ интихоб гардида, ба намоиш гузошта шудаанд.

Дар кори конфронси илмӣ доираи васеи олимон, муаррихон, адибон, айнишиносон ва донишҷўёни Донишгоҳи миллии Тоҷикистон ва Донишгоҳи давлатии омӯзгории Тоҷикистон ба номи С. Айнӣ иштирок намуда, доир ба ҳаёту фаъолият, эҷодиёт ва саҳми боризи устод Садриддин Айнӣ дар рушди илму фарҳанги халқи тоҷик маърӯза карданд.

Ҳамчунин дар ҷараёни конфронси илмӣ директори Хона-музейи Садриддин Айнӣ дар шаҳри Самарқанд Амриддин Пӯлотов тавассути онлайн сухан гуфт.

Ёдовар мешавем, ки намоиши мазкур аз 14 апрел то 1 майи соли равон дар Осорхонаи миллии Тоҷикистон идома меёбад.

Аксҳо аз Осорхонаи миллии Тоҷикистон

Апрель 14, 2021 15:18

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад