«ОМӮЗЕД! ЗАХИРА НАМОЕД! ПУЛ КОР КУНЕД!». БМТ дар доираи «Global Money Week-2021» моҳи саводнокии молиявӣ доир менамояд

ДУШАНБЕ, 11.04.2021 /АМИТ «Ховар»/. Бонки миллии Тоҷикистон дар ҳамкорӣ бо созмонҳои шарик дар доираи маъракаи байналмилалии «Global Money Week-2021» моҳи саводнокии молиявӣ баргузор менамояд. Бархе аз вазорату идораҳои давлатӣ ва ширкатҳои тиҷоратӣ шарикони ин маъракаи таълимӣ мебошанд.

Бонки миллии Тоҷикистон иттилоъ медиҳад, ки «Моҳи саводнокии молиявӣ» ҳамасола дар саросари ҷаҳон баргузор гардида, ҳадафи асосии он баланд бардоштани саводнокии молиявии аҳолӣ, рӯҳбаланд кардани кӯдакон ва ҷавонон барои истифодаи пул ва дар ниҳоди онҳо сайқал додани малакаи соҳибкорӣ мебошад, зеро дар шароити кунунӣ ҷалби кӯдакон ва ҷавонон ба бахши молиявӣ аҳамияти муҳим касб кардааст. «Омӯзед! Захира намоед! Пул кор кунед!» — шиори расмии Global Money Week-2021 мебошад. Ин шиор ҳадафҳои асосии маъракаи Global Money Week-2021-ро инъикос намуда, кӯдакон ва ҷавононро на танҳо ба тақсими оқилонаи буҷа водор месозад, балки дар интиқоли дониши андӯхтаи худ ба оила ва атрофиёнашон кумак мекунад. Илова бар ин, шиори «Омӯзед! Захира кунед! Пул кор кунед!» ба ҳамагон имкон медиҳад, ки оқилона истифода бурдани пул, фикр кардани ояндаи худ, барои худ ва оила пул кор карданро омӯзанд.

Дар доираи баргузории маъракаи Global Money Week-2021 давоми моҳи апрел ташкилоти қарзии молиявии Тоҷикистон оид ба саводнокии молиявӣ барои хонандагон ва донишҷӯён ҷамъомаду  тренинг ва экскурсияҳо ташкил менамоянд. Ҳамчунин дар доираи чорабинии мазкур боздид аз осорхонаи БМТ ва иншооти истеҳсолӣ ба нақша гирифта шудааст. Аз ҷумла, БМТ дар якҷоягӣ бо шарикон мактаббачагону донишҷӯёни ҳавасмандро барои иштирок дар озмунҳои расм, видео ва флеш-моби беҳтарин дар мавзӯи саводнокии молиявӣ даъват менамояд.

Акс аз манбаъҳои боз