Сартабиби корпуси низомии «Шоҳин» дар Балхи Афғонистон аз ҷониби афроди мусаллаҳ кушта шуд

ДУШАНБЕ, 12.04.2021 /АМИТ «Ховар»/. Одилшоҳ Одил, сухангӯи полиси Балх иттилоъ додааст, ки Муҳаммад Солеҳ, сартабиби корпуси низомии 209-уми «Шоҳин» ва ронандаи ӯ субҳи имрӯз (душанбе, 12 апрел) дар шаҳри Мазори Шариф аз ҷониби афроди мусаллаҳи номаълум террор шуданд, хабар медиҳад АМИТ «Ховар» бо истинод ба шабакаи телевизионии tolonews.com.

Ҷаноби Одил афзуд, ки ҳодиса тақрибан соати 06:30 субҳи имрӯз дар чорроҳаи Фирдавсӣ дар Мазори Шариф замоне рух дод, ки афроди мусаллаҳи номаълум мошини хизматии ҷаноби Муҳаммад Солеҳро тирборон карданд.

Дар робита ба ин ҳодиса то ба ҳол касе боздошт нашудааст.

Ҳеҷ гурӯҳе, аз ҷумла «Толибон» (мамнӯъ дар Тоҷикистон), масъулияти ин ҳамларо бар дӯш нагирифтааст.