Дар Душанбе Фестивали ҷумҳуриявии «Сад ранги чакан» баргузор шуд

Май 1, 2021 13:01

ДУШАНБЕ, 01.05.2021 /АМИТ  «Ховар»/. Имрӯз дар Осорхонаи миллии Тоҷикистон  бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон дар доираи эълон гардидани солҳои 2019-2021 Солҳои рушди деҳот, сайёҳӣ ва ҳунарҳои мардумӣ Фестивали «Сад ранги чакан» баргузор гардид. Дар он муовини Сарвазири Ҷумҳурии Тоҷикистон  Матлубахон Сатториён, муовини  Раиси Ҳизби Халқии Демократии Тоҷикистон Хайринисо Юсуфӣ, Раиси Кумитаи кор бо занон ва оилаи назди Ҳукумати Ҷумҳурии Тоҷикистон Ҳилолбӣ Қурбонзода, муовини Раиси шаҳри Душанбе Мавсума Муинӣ, Вазири фарҳанги Ҷумҳурии Тоҷикистон Зулфия Давлатзода, намояндагони вазорату идораҳо, ниҳодҳои корпуси дипломатӣ, чеварону ҳунармандон ва фаъолон аз шаҳру ноҳияҳои ҷумҳурӣ иштирок намуданд.

Матлубахон Сатториён иброз намуд, ки «ҳар қавму миллат ба ҷуз муқаддасоти миллӣ, арзишҳои фарҳангие низ доранд, ки тавассути он ба ҷаҳониён муаррифӣ мешаванд. Тоҷикон аз замонҳои дуртарини таърих ба эҷоди арзишҳои олии фарҳангӣ муваффақ шуда, аз ин рӯ ба унвони “миллати тамаддунофар” шуҳрат пайдо кардаанд».

Зикр шуд, ки баргузории Фестивали ҷумҳуриявии «Сад ранги чакан», ки бо ибтикори Ҳукумати Ҷумҳурии Тоҷикистон  ва Кумитаи кор бо занон ва оила  бахшида ба 30-солагиии  Истиқлоли давлатиии Ҷумҳурии Тоҷикистон дар шаҳру ноҳияҳои мамлакат ҷараён гирифт, яке аз чунин тадбирҳое ҳисобида мешавад, ки ба хотири эҳёи суннатҳои миллии тоҷикӣ сурат мегирад.

«Чакан гулдӯзии одӣ набуда, пайдоиши он ба ҳазораи дуюми пеш аз милод рост меояд. Оид ба кашидадӯзӣ дар китобҳои “Авасто”, “Шоҳнома” ва осори бисёре аз адибони гузашта маълумот дарёфт кардан мумкин аст. Ҳар нақшу нигори болои чакан ба худ маъние дорад ва розҳои модарони тоҷикро дар худ инъикос мекунад»,-афзуд Матлубахон Сатториён

Ҳамзамон муовини Раиси Кумитаи кор бо занон ва оила Заррина Абдулмаинзода зимни суҳбат гуфт, ки “Кумитаи кор бо занон ва оилаи назди Ҳукумати Ҷумҳурии Тоҷикистон бо мақсади ташвиқу тарғиби анъанаҳои неки ниёгон, муаррифии фарҳангу ҳунари волои халқи тоҷик фестивалу озмунҳои ҷумҳуриявӣ, конфронсу симпозиумҳо ва дигар чорабиниҳои фарҳангӣ  амалӣ  менамояд, ки дар доираи онҳо тарроҳону ҳунармандон, чакандӯзону наққошон ва аҳли илму фарҳанг маҳсули эҷоди хешро ба маърази намоиш мегузоранд”.

Мавриди зикр аст, ки баргузории Фестивали «Сад ранги чакан (чакандӯзӣ) яке аз тадбирҳои асили гиромидошти арзишҳои фарҳангӣ  буда, аз рӯи 6 номина: намоиши либосҳои қадимаи чакан, намоиши либосҳои кӯдакона, намоиши либосҳои рӯзмарра, намоиши либосҳои маросимӣ  ва идона, намоиши либосҳои расмӣ, намоиши навъҳои гуногуни сӯзанидузӣ дар се давр баргузор гардид.

Мақсади баргузории фестивал ба баланд бардоштани эҳсоси ватандӯстиву хештаншиносӣ, ифтихори ватандорӣ, арҷ гузоштан ба таъриху тамаддун, фарҳангу адабиёт, расму ойинҳои миллию мардумӣ  ва ба ин васила, муаррифии санъату ҳунари волои халқи тоҷик дар арсаи байналмилалӣ  равона гардидааст.

Баргузории фестивал имкон медиҳад, ки паҳлӯҳои то ҳануз ба ҳамагон норавшани анъанаҳои миллӣ, ҳунари волои чакандӯзии ин ё он маҳал, санъати асили гулдӯзӣ, сузанидӯзӣ, тоқидӯзӣ  ва навъҳои гуногуни нақшу нигори миллӣ  дубора эҳё гардида, мавриди баҳрабардорӣ  қарор гиранд.

Ёдовар мешавем, ки бо иқдомоти наҷиби дурбинонаву ояндасози Пешвои муаззами миллат муҳтарам Эмомалӣ Раҳмон ҷиҳати баланд бардоштани мақому манзалати нақшу нигор, сӯзанидӯзиву гулдӯзии матоъҳои миллӣ, намоиш додани ҳунари волои тарроҳону ҳунармандон дар 13-умин ҷаласаи Кумитаи байниҳукуматӣ  оид ба ҳифзи мероси фарҳанги ғайримоддии ЮНЕСКО дар шаҳри Порт-Луиси Ҷумҳурии Маврикий номинаи «Чакан, ҳунари гулдӯзӣ» дар Ҷумҳурии Тоҷикистон аз ҷониби ин Созмон ба Мероси фарҳанги ғайримоддии башарият расман ворид гардид, ки мояи ифтихори мардуми сарбаланду фарҳангсолори тоҷик мебошад.

Дар фарҷоми намоиш фаъолону ҳунармандон ва тарроҳон бо Диплому сипоснома ва туҳфаҳо сарфароз гардонида шуданд.

 София ШОИК,
АМИТ «Ховар»

АКС аз АМИТ «Ховар»

Май 1, 2021 13:01

Хабарҳои дигари ин бахш

Филмҳои таҳиянамудаи «Тоҷикфилм» соҳиби 20 ҷоизаи байналмилалӣ гардиданд
Дар Теҳрон дар мавзуи «Мероси адабии Рӯдакӣ» нишасти илмию адабӣ баргузор гардид
«ФЕҲРИСТИ НОМҲОИ МИЛЛИИ ТОҶИКӢ». Кумитаи забон ва истилоҳот ба 330 муроҷиаткунанда барои номгузории фарзандон хулосаи рад дод
НИШАСТИ МАТБУОТӢ. Соли 2024 дар асоси Барномаи рушди кино 17 филм наворбардорӣ гардид
Таълимгирандагони «Ворисони Куруши Кабир» дар Осорхонаи миллӣ бо таъриху тамаддуни тоҷикон шинос шуданд
Дар Тоҷикистон азнавбақайдгирии ёдгориҳои мероси таърихию фарҳангӣ оғоз шуд
АРҒУШТИ СИТОРАГОН БУВАД ДАР ЧАКАНАТ. Чаро баъзе аз духтарон дар пӯшидани либос ба фарҳанги бегона рӯ меоранд?
«ОТАШИ ҶАШНИ САДА ОТАШИ МЕҲРИ ВАТАН АСТ». Дар Душанбе ҷашни Сада ва намоиши тухмии зироати кишоварзӣ баргузор шуд
ҶАШНИ САДА НИЗ БАЙНАЛМИЛАЛӢ ШАВАД. Пешниҳоди академики Академияи миллии илмҳои Тоҷикистон Фарҳод Раҳимӣ дар ин мавзуъ
«САДА ОМАД, КИ ТУРО МУЖДА ДИҲАД АЗ НАВРӮЗ». Дар Душанбе ҷашни Сада бо намоиши тухмии зироати кишоварзӣ оғоз гардид
«САДА-ПАРТАВИ ХУРШЕДИИ ИСТИҚЛОЛ». Дар Осорхонаи миллии Тоҷикистон бахшида ба он конфронси ҷумҳуриявӣ доир шуд
ҶАШНИ САДА ДАР ДЕВАШТИЧ. Он бо риояи суннатҳои аҷдодӣ ва шукуҳу шаҳомати хосса таҷлил шуд