Дар Санкт-Петербург шурӯъ аз 17 июн чораҳои бехатарӣ бинобар коронавирус дубора тақвият дода мешаванд

ДУШАНБЕ, 14.06.2021 /АМИТ «Ховар»/.  Шаҳри Санкт-Петербурги Россия шурӯъ аз 17 июн чораҳои бехатариро дар робита бо пандемияи коронавирус тақвият хоҳад дод. Дар ин бора имрӯз ТАСС бо истинод ба хадамоти матбуоти маъмурияти губернатори шаҳр хабар дод.

«Шурӯъ аз 17 июн фаъолияти фуд-кортҳо ва фуд-плейсҳо, ба истиснои онҳое, ки дар вокзалҳо, фурудгоҳҳо, нуқтаҳои фурӯши сӯзишворӣ ҷойгиранд, инчунин расонидани хадамоти хӯроки ҷамъиятӣ бо истифода аз хидмати бурдарасонӣ; кори тарабхонаҳо аз соати 02:00 то 06:00, ба истиснои хадамоти ҳамроҳ гирифтан, ба ҳуҷраҳои меҳмонхонаҳо, бурдарасонӣ ба хона, инчунин ошхонаҳои истеҳсолӣ манъ мегардад (муваққатан боздошта мешавад)», — омадааст дар иттилоия.

Инчунин дар Санкт-Петербург баргузории ҳама гуна чорабиниҳои оммавӣ бо шумораи беш аз 3 ҳазор тамошобин манъ аст. Кинотеатрҳо ҷойро то 50% коҳиш медиҳанд.

Мақомот ба ташкилотҳои шаҳрӣ тавсия медиҳанд, ки ҳузури кормандонро дар ҷойҳои корӣ кам кунанд.

АКС аз ТАСС