Дар Теҳрон доир ба авлавиятҳои раёсати Тоҷикистон дар СҲШ нишасти матбуотӣ баргузор гардид

Июнь 1, 2021 10:20

ДУШАНБЕ, 01.06.2021 /АМИТ «Ховар»/. 30 май дар Сафорати Ҷумҳурии Тоҷикистон дар Теҳрон нишасти матбуотии сафир Низомиддин Зоҳидӣ дар бораи авлавиятҳои раёсати Тоҷикистон дар Созмони Ҳамкории Шанхай (СҲШ, 2020-2021) бо ҳузури намояндагони воситаҳои ахбори оммаи кишвари маҳалли маъмурият баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.

Сафир  изҳор дошт, ки Ҷумҳурии Тоҷикистон дар давраи раёсати худ дар СҲШ, ки ба 20-солагии таъсисёбии Созмон рост меояд, ҳадафҳои таҳкими дӯстӣ ва ҳамҷавории нек байни давлатҳои узви Созмон, тақвияти сулҳ, амният ва субот дар минтақа, густариши ҳамкорӣ дар ҳавзаҳои тиҷорат, иқтисод ва фарҳанг, такмили заминаи ҳуқуқӣ ва тавсеаи абзорҳои ҳамкорӣ дар чаҳорчӯби Созмон, таҳкими эътибор ва тақвияти мавқеи байналмилалии Созмони Ҳамкории Шанхайро пайгирӣ мекунад. Дар давраи раёсати Тоҷикистон дар Созмони Ҳамкории Шанхай баргузории беш аз 100 чорабинӣ ба нақша гирифта шудааст, ки бештари онҳо дар Тоҷикистон ва бархе низ дар кишварҳои дигари узви созмон бо раёсати  Тоҷикистон баргузор мегарданд.

Дар нишасти хабарӣ таъкид гардид, ки Тоҷикистон дар давраи раёсат дар СҲШ талош мекунад, ки ба тақвияти ҳамкорӣ  дар масъалаи мубориза бо терроризм, ҷудоиталабӣ ва ифротгароӣ, муомилоти ғайриқонунии маводди нашъаовар ва ҷинояткории созмонёфтаи фаромарзӣ, ки аз меҳварҳои аслии фаъолияти Созмон аз замони таъсисаш маҳсуб мешавад, мусоидат намояд  ва ҳамзамон  ҷиҳати   дастёбӣ ба татбиқи ибтикори Президенти Ҷумҳурии Тоҷикистон дар бораи таъсиси Маркази зидди маводди мухаддири СҲШ дар шаҳри Душанбе тадбирҳои лозим биандешад.

Сафир дар идомаи нишаст,  бо ишора ба авлавиятҳои раёсати Тоҷикистон дар самтҳои гуногуни фаъолияти СҲШ, таъкид кард, ки чорабиниҳое, ки дар самтҳои сиёсӣ, амниятӣ, иқтисодӣ ва фарҳангӣ баргузор мешаванд, ба  рушду тавсеаи фаъолияти Созмон, таҳкими эътибори он дар арсаи байналмилалӣ, густариши ҳамкории СҲШ бо созмонҳои минтақавии шарик ва дар маҷмӯъ, ба ҳаллу фасли муҳимтарин вазифаҳое, ки имрӯз дар назди СҲШ истодаанд, мусоидат хоҳанд кард.

Баргузории ҷаласаи Шӯрои сарони давлатҳои узви СҲШ, ки ба раёсати Тоҷикистон дар СҲШ дар солҳои 2020 — 2021 нуқтаи таммат мегузорад, 16-17 сентябри 2021 дар Душанбе дар назар аст.

Дар фарҷоми нишасти хабарӣ Сафири Тоҷикистон ба саволҳои намояндагони васоити ахбори омма посух гуфта, изҳори итминон кард, ки раёсати Ҷумҳурии Тоҷикистон дар СҲШ марҳалае муҳим дар рушду тавсеаи ин созмони бонуфузи байналмилалӣ хоҳад буд.

АКСҲО аз ВКХ ҶТ

Июнь 1, 2021 10:20

Хабарҳои дигари ин бахш

Тоҷикистон бо Ботсвана муносибатҳои дипломатӣ барқарор намуд
Дар Душанбе машваратҳои сиёсӣ байни Тоҷикистон ва Латвия баргузор шуданд
Вазири корҳои хориҷии Узбекистон муносибатҳои дуҷонибаро бо Тоҷикистон мусбат арзёбӣ намуд
МУБОРАК БОШАД! «Ҷашни Сада» ба Феҳристи мероси ғайримоддии башарият ворид гардид
НАВИДИ ФАРҲАНГӢ! «Тазҳиб – санъати зарҳалкорӣ» ба Феҳристи мероси ғайримоддии башарияти ЮНЕСКО ворид шуд
Сафири Тоҷикистон дар Туркия бо волии вилояти Денизли мулоқот намуд
НАВИДИ ФАРҲАНГӢ! «Анъанаи бофтани атласу адрас» ба Феҳристи мероси ғайримоддии башарияти ЮНЕСКО ворид шуд
Дар Остона «Бренди миллии Тоҷикистон» муаррифӣ гардид
Сафири Тоҷикистон бо волии вилояти Айдини Туркия мулоқот намуд
Сафири Тоҷикистон бо Мудири генералии Маркази обии Женева мулоқот намуд
Намояндаи Тоҷикистон дар ҷаласаи 7-уми Гурӯҳи кории UNECE оид ба шарикии давлат ва бахши хусусӣ иштирок намуд
Ҳамкории минтақаҳои Тоҷикистон бо вилояти Измири Туркия баррасӣ гардид