Фарҳод Раҳимӣ бо Дмитрий Рогозин мулоқот намуд

ДУШАНБЕ, 13.08.2021 /АМИТ «Ховар»/. Истифодаи имкониятҳои гурӯҳи мадории русӣ барои санҷиши фосилавии Замин барои рушд ва такомули илм ва иҷтимоиёту иқтисодиёти Ҷумҳурии Тоҷикистон,  истифодаи воситаҳои оптикии мушоҳидаҳои Расадхонаи астрономии Ҳисор ва Расадхонаи астрономии Санглоҳи Институти астрофизикаи АМИТ, омӯзиши муштараки ҷирмҳои дар мадори назди заминӣ ҳаракаткунанда, ки ба замин таҳдид мекунанд,  омӯзиш ва таҳқиқи партовҳои сунъии кайҳонӣ, мониторинги доимии пиряхҳои Тоҷикистон бо истифода аз имкониятҳои системаи кайҳонии КД «Роскосмос», омода ва фиристодани қисмати модулҳои (начинкаҳои) электронии АМИТ ба кайҳон тавассути имконоти моҳвораҳои КД «Роскосмос», тайёр намудани кадрҳои баландихтисос барои АМИТ дар муассисаҳои таълимии зерсохтори КД «Роскосмос»  ва дигар масъалаҳо зимни мулоқоти кории президенти АМИТ Фарҳод Раҳимӣ бо директори генералии КД «Роскосмос» Дмитрий Рогозин, ки 12 август дар шаҳри Москваи Федератсияи Русия доир гардид, мавриди баррасӣ қарор гирифтанд. Дар ин бора аз Академияи миллии илмҳои Тоҷикистон ба АМИТ «Ховар» иттилоъ доданд.

Ҳамчунин ҷонибҳо дар рафти мулоқот аҳамияти эҷоди заминаи меъёрии ҳуқуқии заруриро барои ҳамкории дуҷониба дар соҳаи кайҳонӣ зарур шумориданд.

Дар ҷаласаи корӣ директори генералии системаҳои кайҳонии Русия Андрей Тюлин, директори генералии «Главкосмос» Дмитрий Лоскутов, муовини директори генералии «TERRA TECH» Максим Болтачев ва мушовири Сафорати Ҷумҳурии Тоҷикистон дар Федератсияи Русия Шараф Раҳимов иштирок доштанд.

Дар ҷараёни вохӯри таъкид гардид, ки ҳамкории тарафайн дарозмуддат хоҳад буд. Дар марҳилаи аввал афзалият ба таълими кадрҳо ва таъсиси модули гирифтани тасвирҳои моҳвораӣ (ба мо имкон медиҳад, ки  зуд тасвирҳои хушсифати тамоми ҳудуди Тоҷикистонро дар режими онлайн дастрас намоем) дода мешавад.

Ҷонибҳо зикр намуданд, ки он тавофуқҳое, ки дар ҷараёни мулоқот ҳосил гардида, як қадами муҳим дар густариши ҳамкориҳои Русия ва Тоҷикистон хоҳанд буд ва ба таври ҳамаҷониба ба рушди шарикии мутақобилан судманди Ҷумҳурии Тоҷикистон ва Федератсияи Русия дар бахшҳои аз ҷиҳати стратегӣ муҳим мусоидат хоҳанд кард.

Истифодаи технологияҳои назорати фосилавии Замин ба манфиати рушди иҷтимоию иқтисодии Тоҷикистон арзёбӣ шуда, айни замон яке аз самтҳои афзалиятнок, таъхирнопазир ва муҳимтарини таҳқиқоти илмии Академияи миллии илмҳои Тоҷикистон дар марҳилаи кунунӣ ҳисобида мешавад.

Зикр шуд, ки ҳамкориҳои дуҷонибаи олимони тоҷик ва рус дар самти истифодаи имкониятҳо ва иқтидори илмии кишварҳо, натиҷаҳои фаъолияти муштарак дар самти омӯзиши кайҳон барои рушд ва пешрафти илму технология, иқтисодиёт ва иҷтимоиёти ҳарду кишвар муҳим арзёбӣ шуда, қадами устуворе дар роҳи таҳкими шарикии боэътимод байни ин ду ташкилоти бонуфуз ва мусоидат ба ташаккули модели муассир ва лоиҳаи ҳамкории минбаъда байни Ҷумҳурии Тоҷикистон ва Федератсияи Русия хоҳад гардид.

Акс: АМИТ